Coppa Italia quarter-final: Roma hnehtu Milan

Coppa Italia quarter-final:
Roma hnehtu Milan
Nilaini zan Coppa Italia quarter-final match-ah AC Milan chuan an mikhual AS Roma lakah 3-1 hnehna changin, home team tan hian debutant Joao Felix chuan second half-ah Milan goal thumna a thun a; loan-a a chhuahsan mek a parent club Roma lakah Tammy Abraham chuan first half-ah goal hnih a khung ve bawk.
English striker Abraham hi season khat chhung Milan lama intuaihriam turin Rome khaw club chuan loan-in an chhuahtir a, minute 16-na lekah a tirbotute lakah goal hmahruai khungin, minute 42-ah Milan goal hnihna a thawh zui leh ngat a ni.
Kum 2021-a Roma zawmtu Abraham-a’n amah tirchhuaktute lama goal a khung avang hian a hmuna inkhel entu mipui 57,878 zinga Roma tantute’n an ‘boo’ khum hluah hluah!
Inkhelh banah Abraham-a hian a parent club laka goal khung kha nuam a tih bik loh thu sawi chungin, “Ka goal khung kha ka celebrate-ah an ngai niin ka hria a, Pathian hnena lawmthu ka sawina a ni zawk. Hei hi football a ni miau a, heti ang thil hi thleng ve thin reng a ni,” tiin a chunga thil thleng a pawm thiam thu a tarlang tel.
Second half tir lama Stadio Giuseppe Meazza luahtute la inthlahdah lai nangfuhin Roma player Artem Dovbyk chuan mikhual siphurh pakhat zawk a sut then a, mahse, Chelsea atanga deadline-day loan-a an lakchhuah substitute Felix chuan AC Milan tana a inkhelh vawikhatnaah goal khung nghalin, minute 72-ah home team goal phai a chhungkhat.
Portugal star Felix hian nikum nipui thawt lai khan Atletico Madrid atangin Chelsea hi pound maktaduai 45-in a zawm a, West London club-in Italy ramah loan-in an chhuahtir mek a ni.
England right-back Kyle Walker pawh Milan-ah hian loan-in a khel mek a, Nilaini zan khan Manchester City a chhuahsan lailawk hnua Milan tana a game hnih khelhna chiah a ni ve bawk.