Copyright Law

Dr. K. Remruatfela
Chamber of Liberty
Khawvel finna leh thiamna lo sang chho zelin a ken tel pawimawh tak chu mahni kut kea din duhna, sawrkara innghat ngawt lova, mahnia thil thar ngaihtuah chhuah a, chu chu a taka chan tir duhna lo pung chho ta hi a ni awm e. Tun hmaa kan lam rik khat em em thin – Copyright, Patent, GI tihte chu tawngkam tlanglawn a ni chho ta reng mai a, hmasawnna lawmawm tak a ni. A bik takin social media lam luhchilhtute zingah leh ziak mi/zai mi te zingah ngat phei chuan Copyright tih thumal hi a mikhual ta lo hle.
Chutih lai erawh chuan zirchianna atanga a lan danin a mi nawlpuiin Copyright Act awmzia hi a thuphunga kan hriat chian viau laiin chik taka zir chiang leh a nihna dik tak hriaa, hman tangkai dan thiam erawh kan tam lo hle tih a lang a. Amaherawhchu, a lehlamah copyright bawhchhiatna erawh a hluarin, Mizo society-ah bu a khuar thuk tawh hle a ni tih a lang chiang em em bawk si a. Chu chuan Copyright dan hi thuk zawka luhchilh a hun ta tak zet ta tih min hriat chhuah tir thei awm e. Chuvang chuan kan zir bingna (thesis) te hi degree hlawh chhuahna ringawta a tawp lova, zau zawka mipuiten an chhawr zui theihna turin a tlangpui ka`n keu hawng ang e.
Copyright law tih hi a awmzia ber chu a tawi zawngin, thil phuah chhuah thar (original work) neitute dikna chanvo humhalh tlatna dan tihna a ni mai a. Hei hian lehkhabu, hla, lemziak, thlalak, movie, software leh thil dang, mahni rilru leh kut chhuak, kan remtihna tel lova midangin an thawn darh emaw hralh emaw hlawkna atana an lo hman theih lohna tura humhalhna zawng zawng a huam. Nimahsela, heta kan hriat tur pawimawh em em chu miin chu kan copyright work chu zirna kaihhnawih thilah emaw, news atan emaw research thil emaw an hman a, an thulakna hnar dik taka an tarlan chuan he copyright dan hian hriatthiamna zau tak a nei a, thil dik lo anga ngaih a ni lo.
Mi tam tak chuan kan lehkhabuah te, kan music video-ah te leh kan thil upload hrang hrangah te ‘Copyright reserved’ tih hi kan ziak lang kher thin a, chuta kan ziah lan tawh chuan him zual ta em em ah te kan inngai ta thin ni te pawhin a lang. Nimahsela, kan hriat reng tur chu, kan ziak lang emaw lang lo emaw, kan irawm chhuak ngei, a taka kan chan tir a, a bu zawng emaw, a video zawng emaw a rawn chhuak a nih phawt chuan copyright hi kan nei sa vek a. Chu kan copyright chu miin an lo bawhchhiat palh a, thuneitute hmaah zangnadawmna kan hmuh theihna turin evidence atan kan copyright work chu dan ang thlapin kan register mai thin zawk a ni. Hei hi kan hriat chian a tul hle.
Mizote hi thluak chak leh fing tak kan ni a. Mi tih dan entawn phei hi chu kan chem kalna tak niin kan thiam zung zung a, a original ai mah te hian kan thiam zawk emaw tih mai tur a nih changte a awm thin a, hemi kawngah hi chuan hnam dangte hian min pha lo viau. Chutih lai erawh chuan, thil pawi em em tak mai chu mahnia thil thar puak chhuak kawngah erawh kan chak lovin, kan hnufum em em lawi si hi a ni. Kan hla tha tak takte pawh hi hnam dang hla thluk kan lak a, keimahni rilrem zawnga kan siam rem a ni tlangpui a. An idea, a taka an chantir kan ruksaka te hian min rawn hmuh pui thin loh vang mai maia buaina tawk lo mai chauh kan ni tih te hi kan inhriatchian a tul.
Tin, thil mak tak pakhat chu zir chianna atanga a lan dan chuan Mizo literature khawvel zim te-ah hian copyright bawhchhiatna hi a lo hluar ve ta em em mai a. Court leh Police Station em thleng si lo a, mi thuziak tawh sa lo inruk sak a, mahni kutchhuak anga rawn lantir a, zawrh sum atana rawn chhawp chhuak ta mai hi sawi tur an awm ta fo a. Kei ngei pawh hi a tuartu zinga mi ka ni. Mizote hi kan la tlem em avanga mi tam takin, kan kutchhuakte hi eizawnna leh innghahna tana kan hman/neih a nih hlawm thin loh avangin kan ngawi ral ta mai mai thin ni te hian a lang a. Khawvel hmasawnna thang chho zelah hian chutiang ringawt chu a ni kumhlun dawn lo tih erawh a chiang.
Thil runthlak em em chu heti taka copyright bawhchhiatnain kan khawtlangah bu a khuar tawh kan tih lai hian lo do a, lo hmachhawn tur hian mipui chu sawi loh, a sawrkar ang pawh hian kan la inpeih lo em em a. Patent lamah hma kan sawn chhoh viau tawh laiin Copyright dan lam kengkawhtute erawh an la chaurau hle. Heti lo deuha ngaihtuahna thar kan sen hi a hun tak zet tawh tih a chiang. Chumi atana kawng pawimawh hmasa chu a thawktute thuam that leh department puitlinga hlan kai vat hi a ni. Tin, School, College leh NGO angah te pawh Copyright lam inztirtirna lam hawi hi kan uar chhoh a pawimawh tak zet a. Chuti a nih loh chuan kan inrin loh karah kan society hi hmasawn tur chuang awm tawh lovin a tlu chhe rup palh ang tih pawh a hlauhawm.
Copyright dan hrim hrim hi ngun taka han zir chian chuan Mizo khawtlang nun nena han inmil lo leh siam rem ngai hlek hlek chu a awm a nih phat thu a cheng lo a. Hengte pawh hi kan chik a pawimawh hle. Copyright dan hi chuan copyright neitute venhim leh an thiamna hmanga hlawkna an pumbilh theihna tura humhalh a thupui laiin Mizo society-ah erawh ‘sem sem dam dam, ei bil thi thi’ tih thuthlung hian thui tak min la tuam thung a. Pi Hmuaki thawnthu atang ringawt pawhin a chiang viau. Hengah te pawh hian Art.371G hi pawh fan dan a awm thei ang em tih te hi ngaihtuah chian a ngai viau a ni. A tul dan azirin kan la sawi chho zel ang…