Corinthians mi thar Depay

Kumin July thlaa free agent ni chunga Atletico Madrid chhuahsan Dutch forward Memphis Depay chuan kum hnih chhung atan Brazilian club Corinthians a zawm fel tawh a, a contract ziah ang chuan December 2026 thleng South America lamah hian a khawsa dawn a ni.
Kum 30 mi Depay hian season liamta khan Atletico tan game 31 khelin goal kua a thun a; kumin nipui lai khan Netherlands tan Euro 2024 khel bawk mah se tun September thla Nations League lamah erawh head coach Ronald Koeman chuan squad-ah a telh ta rih lo.
Koeman-a sawi dan chuan Europe pawn lam daih South America lam lama a insawn vang ngawta Depay chu a team-mate Steven Bergwijn anga international kawngkhar khar hnan hlen tur a ni lo!
Saudi Pro League lama a insawn avang khan Bergwijn hi nasa takin Koeman chuan a lo sawisel tawh a, mahse, Dutch coach hian chanchinbumite hnenah Saudi lama Steven Bergwijn insawn kha pawmpui lo mah se tuna Memphis dinhmun hi chu a danglam daih tih sawiin, Brazil ram league chu pawm theih a nih thu leh Europe pawn lamah chhuak mah se national team-ah hmun a la chang leh thei niin a sawi a, chu erawh a fitness leh a khelh dan level-a innghat tur a nih thu a sawi.
Depay hian kum 2011 khan an ram club lian PSV Eindhoven-ah a career tanin, kum 2023-a Atletico a zawm hma khan Manchester United, Lyon leh Barcelona lamah a kual hman.
Kum 2013-ah Netherlands tan khel tanin, ram tana game 98 a khelh tawh atangin goal 46 a khawl tling tawh.