Corporator thar thlan turah ZPM-in candidate an puang

Aizawl Municipal Corporation Ward No. XIX corporator thlan turah ZPM party chuan an candidate atan Dr C Malsawmtluangi, Hlimen Vengthlang an ruat.
Thawhtanni khan ZPM Gen. Hqrs president Lalliansawta chuan an candidate hi a puang a. Candidate thlan chungchangah fimkhur leh uluk takin hma an la a, candidate tha tak an nei chu an lawm hle tih a sawi. ZPM kaihhruai sawrkar hnuaiah corporator tha tak an neih theihnan Ward No. XIX chhung mipui thawhpuiah an sawm a, an candidate thlangtling turin an ngen tih a sawi a ni.
ZPM official candidate Dr C Malsawmtluangi chuan ram leh hnam tana ke pen ve thei tura mawhphurhna a chang chu a lawm hle tih a sawi a. Corporator a nih theih nan ward chhung mipui thawhpuiah a sawm tih a sawi a ni.
ZPM candidate Dr C Malsawmtluangi hi thiamna lamah kum 2011 khan NEHU Department of Zoology hnuaiah Ph.D a zo a; kum 2014-2016 chhung khan sawrkar laipui Department of Science & Technology hnuaiah women scientist (WOS-A) in a thawk a. Kum 2018- 2021 chhung khan National Mission on Himalayan Studies (NMHS) GBPNIHESD under Himalayan Fellowship-ah research associate a ni bawk. Hlimen Vengthlangah chengin a pasal Lalmuanawma nen fa pathum an nei a ni.
AMC Ward No XIX corporator Baryl Vanneihsangi Tlau chu 2023 MLA inthlanah Aizawl South III biala thlantlin a nih avangin a hmun hi a ruak a, a aiawh tur hi thlan a ngai ta a ni.