Country Artist ropui berah Dolly Parton an thlang
Billboard chuan Dolly Parton chu country artist awm tawh zinga ropui berah an puang a, hetiang chawimawina hian a barakhaih hle niin Parton chuan a sawi. Billboard hian November tla tir atang khan 100 Greatest Country Artist of All Time list a tahtawl te tein an tichhuak a, list No.1-ah Dolly Parton a chuang ta vang a ni.
Parton chuan, “Billboard Magazine-in greatest country artists of all times list an tichhuak a, a chung berah ka hming a lo awm ve chu niin! Awihawm loh zawk ê!” tiin he chawimawina chungchanga a sawi zuina video a tichhuak.
Parton hian 1967 khan a album hmasa ber ‘Hello, I’m Dolly’ a tichhuak a, heta tang hian Billboard Country Songs chart-a No.1 kai thei 25 nei tawhin, hmeichhe zaithiam zingah a ngah ber a ni. Parton hian Country Albuums chart-ah pawh top 10 kai thei album 49 a nei a, 2023 khan a album Rockstar chu No.1 a la kai zak zak thei. Tunah kum 78 mi ni ve tawh mah se entertainer ngainat hlawh ber zingah a la tel pha.
Naupan lai atanga country music ngaina nghal a ni a, “Hmeichhe naupang ka nih laiin radio-ah Grand Ole Opry ngaithlain, mi lar tak tak Hank Williams leh Kitty Wells bakah Johnny Cash te ka ngaihthlak thin khan keipawh anni ang ni ve tur chuan ka insuangtuah thin,” a ti.
Parton chuan Billboard chungah lawmthu a sawi bakah a lawmna ber chu a fan-te an nih thu sawiin, “Ka music te khawvel hmun hrang hranga put darh theihna remchang min siam a, a suangtuah thin chu a taka inthlen tir avangin ka lawm e,” a ti bawk.
100 Freatest Country Artist of All Time list hi Billboard editorial staff ten zaithiam 200 dawn atangin tehna hrang hrang hmanga an theh hnuah an siam a ni a, mahse, mainstream country artist chauh an telh a, a genre hnuaia awm tho Americana/ bluegrass te chu an huam tel lo thung a ni.
Country Artist ropui berah Dolly Parton an thlang
Get real time updates directly on you device, subscribe now.