Court-ah Maduro inlan, an ram rorel khawlin chhuah an phut

Delcy Rodríguez-i chu Venezuela-a an president lailawk atan parliamentary session-ah lak luh a ni a, session-ah hian US-in an hruaitu a hrensak mek, Nicolás Maduro-a chu chhuah tura an duh thu an sawi bawk.
Kum 56 mi, Rodríguez-i hi kum 2018 atanga vice president a ni a, Inrinni zana US sipaiten luhchilha Maduro-a leh a nupui, Cilia Flores-i ‘ruk bo’ an ni chuan a tina hle tih a sawi.
Hemi hma darkar hnihah hian New York court room-ah Maduro-a chu a inlan ve thung a, Venezuela president a la nih reng thu a sawi bakah ruihhlo tawlh leh firfiaka chetnaa tela an puhna chu a pha.
Hetih lai hian US chet dan hi UN chuan na takin a sawisel a; mahse, US palai chuan khawvela energy awm khawm lian ber chu dan lo hruaitu, ‘dikna laka tlanchhe’ thuhnuaiah a awm theih loh thu a sawi ve thung.
Court-a Maduro-a a inlan hma hian UN Security Council chu Venezuela-a thil thleng avangin hmanhmawh takin an thukhawm a. Venezuela palai, Samuel Moncada chuan an ram chu ‘dan ang taka thiltih awm miah lovin tharumin dan lovin beih a ni’ tih a sawi.
US palai, Mike Waltz-a chuan Maduro chu ‘dan tlinglova president ni ta’ niin a sawi ve thung a. A man turin US chuan ‘tum bik neiin beihpui an thlak’ tih a sawi bawk.
Maduro-a hi ruihhlo tawlh, cocaine thawn lut, machine gun kawl leh thil dang dang, amah puh chhiat theihna tur thilte tichhiaa puh a ni.
Thawhtanni chawhnu (India-a zanlai)-a court-a a inlan lai hian mipuiten Spanish tawngin Maduro-a hi an au va, a thiltih man chu a hmu dawn tiin an au khum.
Maduro-a hian an lam a hawi a, ‘president ruk bo’ a nih thu leh ‘indona avanga man’ a nih thu a sawi a, a nupui hnungah court hnung kawngkharah hruai chhuah zui a ni.
A hmaa darkar chanve chhung a chungthu ngaihtuahnaah, “Mi sual ka ni lo. Kan ram president ka la ni reng,” a ti.
Federal Legislative Palace-ah chuan Venezuelan sang tel pungkhawmin Maduro, a nupui leh an president lailawk atana lak luh, Rodríguez-i an thlawpzia an lantir.
Rinawmna thu a tiam zawha an ram rorelna in, National Assembly-a thu a sawiah an hruaitute chunga thil thleng chuan a tina tak zet tih Rodríguez-i chuan a sawi.
An ramah muanna thlen a tiam a, ‘kan mite, kan eibar leh kan khawtlang nunah muanna a awm zel theih kan ka bei dawn a ni’ tih a sawi.
Assembly-ah hian Maduro-a fapain a nu leh pa a thlawpzia sawi chhuah a ni bawk a, Venezeula-ah ‘an kir leh dawn’ an ti a. Rodríguez-i a thlawp tih a sawi bawk.
Court-a Maduro-a thubuai ngaihtuah leh hun tur hi March 17 a ni ang.