Court case-a inlan naupang 814-in Children’s Room tangkai pui tawh

Court case-a inlan naupang 814-in
Children’s Room tangkai pui tawh
Mizoram State Commission for Protection of Child Rights hmalaknaa Aizawl District Court-a siam ‘Child Welfare Officer Room leh Children’s Room’ siam chu court case-a inlan ngai naupang 814-in an hmang tangkai tawh.
Mizoram State Commission for Protection of Child Rights (MSCPCR) hotute chuan chief minister Lalduhoma an kawm a. Chairman Jimmy Laltlanmawia, member secretary Lalengvari leh member dangte an tel. ‘Naupangte aw’ ni tura sawrkar laipuiin Commission hi a din a nih angin, chak zawka naupangte dikna chanvo (rights) an humhalh theihnana hmalak dan tur an sawipui.
Chief minister chuan Mizorama POCSO case a pung zel chu pawi a tih thu sawiin, naupangte laka pawikhawihtute chungthu rang taka relfel leh naupangte dikna leh chanvo humhalhna dan tha taka kenkawh chu a ngaipawimawh tih a sawi a ni.
MSCPCR hi Parliament dan siam ‘The Commission for Protection of Child Rights Act 2005’ hnuaia din a ni a. Parliament dan siamah hian Mizoram sawrkar chuan a taka kalpui thei turin ‘The Mizoram State Commission for Protection of Child Rights Rules 2017’ a siam a, hemi hmang hian MSCPCR hi February 2018 thla khan din a ni.
MSCPCR hmalaknain School Education department-ah routine school inspection neih thin a ni a. Safety of school research-a hmuhchhuah atangin recommendation a siam. Kum 2023 khan Aizawl District Court-ah ‘Child Welfare Officer Room leh Children’s Room’ siamtir a ni a, hmang tangkaitu naupang 814 awm tawhin heng zinga 113 chu POCSO case avanga court-a kal an ni.