Court-in Malaika Arora lakah bailable warrant tichhuak

Court-in Malaika Arora lakah bailable warrant tichhuak
Mumbai court chuan 2012-a hotel-a intihbuaina thlenga thuhretu tura koh Bollywood actress Malaika Arora chu court-a a inlan loh avangin bailable warrant a tichhuak a, ‘witness anga court-a inlan loh’ tiin warrant-ah hian tarlan a ni.
He thubuai hi February ni 22, 2012 a thil thleng daih tawh kha niin, Bollywood star Saif Ali Khan leh a thiante chu Mumbai a five-star hotel-ah zanriah ei turin an kal a. Saif te dawhkan lamah chuan an tawng ring ta deuh a, chumi ngaithei lo chuan India chhul chhuak South African sumdawng Iqbal Mir Sharma chuan a complaint ta a. Hetah hian inchhang lawkin, Saif hian Iqbal hi a vau hnuah a hnarah hnek sakin, Iqbal-a hnar ruh hi a tliak nghe nghe a ni. Iqbal Mir Sharma chuan Saif leh a thiante chuan a puzawn Raman Patel chu an khawih tel niin puh bawk.
He thil thlen lai hi Saif Ali Khan lar vanglai niin, chutihlai a ngaihzawng, tuna a nupui ni ta, Kareena Kapoor Khan leh Karisma Kapoor, Malaika Arora, Amrita Arora leh an thian dangte an tel a, Malaika hi an intihbuaia dawhkawn kiltu zinga mi a nih avangin thuhretu pawimawh tak a ni ta a ni.
Chief Judicial Magistrate K S Zanwar-a’n he case-a thuhretu hrang hrang chu court-a inlan turin a ko a, Malaika Arora hi a inlan loh avangin February ni 15 khan bailable warrant a lo tichhuak tawa, tunah a inlan leh tak loh avangin Thawhtanni kalta khan warrant a tichhuak nawn leh ta a ni. He case-a hearing hi April ni 29-ah neih leh tura ruahman a ni.
Saif Ali Khan leh kut thlaktu a puh midang Shakeel Ladak leh Nilal Amrohi te chu he thil thlen hnu lawk hian manin, bail a chhuah leh nghal an ni a, an pathum hian section 325 IPC bechhanin charge sheet an ni. Saif chuan Iqbal Sharma hian an dawhkan kilpui hmeichhia te lakah tawngkam tlahawlh tak a man avanga buai ta an nih thuin tan a khawh ve thung a ni.