Court thu anga dah nghet turin SSA zirtirtuten ngen

Court thu anga dah nghet
turin SSA zirtirtuten ngen
Mizoram SSA Teachers Association (MSSTA) chuan High Court thu anga dahnghet thuai turin Mizoram sawrkar an phut.
MSSTA thuchhuak chuan, Samagra hnuaia primary leh middle school zirtirtu an ni a, Mizoram sawrkar hnuaiah an chanvo dik tak chang lo nia an inhriat avangin 2019 September 19 khan Gauhati High Court Aizawl Bench-ah state sawrkar an khing a, 2023 March 17-a High Court thutlukna siamah SSA zirtirtute dah ngheh dan tur point thum a siam tih a sawi.
Court hian Mizoram sawrkar chu heng point pathum zinga a duh ber thlang tur leh, Right to Education Act (RTE) Rules zawm chung zelin – primary leh middle school zirtirtu post ruak a awma dah luh emaw SSA zirtirtu tan bik post siam sak emaw dah nghehna tur scheme siama a tahtawla dahnghet emaw turin a ti tih a sawi a ni.
Mizoram sawrkar chu thla 6 chhunga heng point pathum zinga engemaw ber hmanga SSA zirtirtute dah nghet tura tih a nih thu sawiin, thla 6 chhungin sawrkar chuan court thutlukna hi a tihlawhtling thei loa, sawrkar atanga hmalakna tak tak a awm loh avangin 2023 September 29 khan Court zah lohna – contempt of court thehluh a ni a, kum hnih hnuah pawh hmalakna liantham a awm lo tih a sawi bawk
Mizoram sawrkar hian 2024 June 18 khan CSS Regularisation Scheme chu gazette-ah a tichhuak a. He scheme hi court-in CSS zirtirtute dah nghehna tura siam leh sawi a nih lai leh, an siam chhan tumah dah ngheh an la awm loh laiin, Health department hnuaia health worker mi 31 dah ngheh an ni ta daih tih a sawi a. Dan ngaipawimawh tak sawrkarin court thutlukna zahsak a, dah nghet thuai turin an phut tih a sawi a ni.