Court thu angin mi ram luah luitu chhungkaw 3 chhuah tir

Court thu angin mi ram luah
luitu chhungkaw 3 chhuah tir
Aizawl District Court thu angin mi rama in saa khawsa zui chhungkaw thum chu chhuah luih tir an ni.
Thudawn danin, C Zarzoliana, Dawrpui Aizawl ram, LSC fel tak neihna Chawnpui Veng Aizawla khawsa chhungkaw pathum chu Aizawl District Court civil judge thupek angin district magistrate chuan dan tlawhchhanin 2025 June 3 khan chhuak turin a ti a, a hmunah executive magistrate leh police-ten kalchilhin, an chhuah duh loh avangin tharum hmanga chhuah luih tir an ni.
The Aizawl Post thudawn danin, ram neitu hian a rama in saa luahtu chhungkaw thum (pa ber hming theuhin) bakah Land Revenue & Settlement department chu court-ah a khing a. Court hian uluk taka a ngaihtuah hnu ah helai ram luah mektute chu chhuak turin ‘order’ a siam a ni.
Chhuak tura tihna lehkha (order) hi tum thum vel pek an ni tawh a, an zawm duh loh avangin court hian 2025 June 4 ralhmaa chhuahtir ngei turin district magistrate a ti a. Hemi ang hian June 3 khan chhuahtir an ni ta a ni.
Chawnpui Local Council lam chuan helai ram chungchangah hian kum thum vel kalta khan court-in in satute hi chhuak turin a lo ti tawh tih chu an hriat chin a ni a; tun tuma thil thleng chu an hriatpui lo tih an sawi.