Court thutlukna puang dawn ta

Dan leh hrai lama tuite’n an ngaihven a, anni chauh an ni lo, politics-a tuite pawhin an ngaihven; VC leh Local Council inthlana dingte tan pawh ngaihven loh theih a ni lo ang – Mizoram sorkarin VC term a pawh tawi chungchang khinnaa court thutlukna puan a ni dawn ta.
Gauhati High Court, Aizawl Bench-in Zirtawpni hian VC term pawh tawi chungchang khinnaa thutlukna a puang dawn a, chawhma lama puan tura tih a ni.
Ningani khan Zirtawpni-a court hnathawh tur indawt dan a chhuak a, court list-ah VC term pawh tawi khinna chungchang hi a hmasa berah dah a ni.
Court thutlukna hi tun kar chhunga puan tura ngaih a ni sa a, thil dang tihfel vek tawh niin, thutlukna chiah hi nghah a ni tawh. A ngaihtuahtu justice hi kar leh lamah bench dangah a kal dawn avangin tun kar chhunga thutlukna a puan hman a ngai bawk. Justice-te hi high court hnuaia bench hrang hrangah inthut chhawk turin an kal kual thin a ni.
VC term pawh tawi chungchang hi East Lungdar VC president K Lalngaizuala’n a khing a, Mizoram Village Council Association (MVCA) president a ni bawk. A tirah chuan MVCA hmingin an khing a, mahse MVCA hi registered a lo nih loh avangin court-in a hnawl a, K Lalngaizuala’n a mimalin a khing ta a ni.
VC term pawh tawi chungchang khinna hian Local Council lam pawh a nghawng thei a, inthlan puan a lo ni tawh bawk nen, a thutlukna azirin nghawng a nei thui thei a, hei vang hian ngaihven a hlawh hle.
VC term pawh tawi khin hnu hian Mizoram sorkarin LAD secretary a thlak a ni.
Tun hnaiah Hnahlan, Thekpui leh Sialhawk VC thiah chungchangah court-ah sorkarin thiam loh a lo chang tawh a, mahse heng hian nghawng a nei thui lem lo.
Court hian February ni 3 khan tih tur a tifel a, chumi hnuah thutlukna puan chiah hmabak a awm tawh. Tih dang pangngaiin thutlukna puan lai hian court-ah a lehlam lehlam ukil-te an inlan ang.