Covid-19 vei pung thar leh

A reh vang vang hnuah tunlaiin Covid-19 a rawn inlar leh a, a vei pawh an pung leh. Mahse a hluar tia han sawi tur khawp a ni lo a, a darh tia sawi tur khawp a ni lo.
Kuminah thla thum chhung Covid-19 hri vei an awm loh hnuah thla hmasaah hri vei hriatchhuah an awm leh a, tun thlaah an awm leh bawk.
IDSP te’n an chhinchhiah danin, June-ah khan Mizoramah hri vei mi pakua an awm a, tun thlaah ni 30 thleng khan mi 10-in an vei tih hriatchhuah a ni tawh. A hnuhnung ber chu ni 29-a endik, hemi zana result hriat a ni.
Kuminah hri vei hi mi 24 an awm tawh a, mipa 11 leh hmeichhia 13 an ni. Mi 18 chu an dam tawh a, July ni 30 thleng khan hri vei mek mi paruk an awm.
January-ah khan hri vei hi pahnih an awm a, February-ah pathum, March, April leh May-ah an awm lo a, June leh July-ah an awm leh a ni.
Nikum lamah khan hrileng hi a reh hman a, nikum October ni 19 hnuah hri vei hriatchhuah an awm lo. Chumi hnua hriatchhuah hmasak ber chu January ni 24-a mi a ni a, ni 24-ah an awm leh. February ni 9-ah an awm leh a, ni 15-ah an awm leh.