Covid lakah district pakua him rih

Tun hnaiah Mizoramah Covid-19 hri vei an awm leh a, a hluar tia sawi tur chu a ni lo. District pakuaah phei chuan vanneihthlak takin kuminah hri vei an awm rih lo.
IDSP te’n an chhinchhiah danin, kumin hian Aizawl district leh Serchhip district-ahte hri vei an awm tawh a, district dang pakuaah chuan hri vei hriatchhuah an la awm lo.
March, April leh May-ahte hri vei an awm loh hnuah June ni 4-ah hri vei hriatchhuah an awm leh a, July ni 29 thleng khan hri vei hriat thar hi an awm. June-ah mi pakuain hri an vei a, July-ah ni 31 chhun thlenga hriat chinah mi 10-in hri an vei.
Health department lam atanga thu dawn danin, June leh July-a hriatchhuahte hi natna dang vanga inenkawl, an nat dan a rinhlelhawm avanga doctor te’n endik tul an tihte an ni hlawm. Naupang atanga tar thlengin an ni.
A then chu natna dang vanga na ang reng te pawh an awm a, Covid-10 ngau ngauah chuan na tak tia sawi tur an awm lo tih thu dawn a ni.
Hri veite hi khung hran thin an la ni a, a then chu damdawi ina awm sate an ni. Ni nga vel khung hran an ni tlangpui a, an nat dan azira ni sarih awm hrantir pawh an awm.
IDSP te’n an chhinchhiah danin, Mizoramah Covid-19 case 239568 a awm tawh a, vei mek paruk an awm, Aizawl district mi vek an ni.

Covid hmuhchhuah hnuhnun ber ni
Aizawl 29-7-24
Champhai 4-7-23
Hnahthial 3-10-22
Khawzawl 11-5-23
Kolasib 10-6-23
Lawngtlai 4-11-22
Lunglei 1-7-23
Mamit 16-11-22
Siaha 6-10-22
Saitual 2-5-23
Serchhip 4-6-24