Covid vanga sum hmuh tlem thu ah ZPM-in dawt an sawi – MNF

Covid len laia sum harsatna avanga Mizoram sawrkarin a sum hmuh tur hmu lo anga sawi thin chu a dik a, ZPM-in Covid vanga sum tam tak state-in a hmuh tho avanga chhuanlam tling lo anga an sawi thin chu thu belh chian dawl lo a ni tih MNF chuan an sawi.
MNF general secretary PC Laldinthar chuan Mizoram sawrkarin Covid len laia sum harsatna avanga sawrkar laipui atanga sum a dawn tur cheng vaibelchhe 2636.52 a dawn loh thu leh, hemi lai veka a dawn belh vbch. 2563.17 inthlauhna chu vbch. 73.35 chauh a ni, tia ZPM-in an sawi chu a dik lo tih a sawi a. Central atang hian Covid avanga tanpuina sum hmuh belh nia ZPM sawi hi a dik loa, Covid puala central atanga Mizoramin tanpuina a hmuh chu Rs. 79,62,88,000 vel bak a ni loa, RTI hmanga zawhna Finance department chhannaah central atanga sum hmuh tur anga chhut lawk, hmuh leh tak loh hi vbch. 2636.52 niloin, vbch. 2632.58 zawk a ni tih a sawi.
Covid avanga Mizoramin sum a hmuh tur ang a hmuh loh chungchanga RTI chhanna hi 2021 June 30 thleng chauh a ni bawk, tiin, hemi hnulamah pawh Covid a la leng nasa hle a, hemi piahlama kan hmuh tur ang hmuh loh leh Covid avanga state own tax leh non-tax revenue lak theih loh nen chuan cheng vbch. 3000 a chuang daih ang tih thin a ni tih a sawi a ni.
“ZPM-in an sawi, kan hmuh belh hi chu share of taxes atanga hmuh a ni a, heng hi chu sawrkar hnathawk hlawh leh pension lawmman, ni 1.9.2018 atanga sawrkarin 7th pay a pek punna kumtin senbelh pawh a daih lo hle. Heng bakah hian district headquarters pathum function-na leh tih changtlunna cheng vaibelchhe tam tak a awm a, raltlan mi 50000 vel kan kawl reng bawk a. Sum hman tur kawng hrang hrang a tam em em a. ZPM hian share of taxes-a kan hmuh belh an sawi lar hle laiin, Post Devolution Defisit Grant (PDRDG) a kumtin kan hmuh tlem erawh an sawi duh lo,” PC Laldinthara hian a ti.
Covid leng a ziaawm deuh hnu ah, state tinten corporate tax, income tax leh GST kan chhunluh a pung a, kan state chan tur share of taxes a pung a, ram sum dinhmun a that a, kan tax chhunluh a pun zel chuan, share of taxes chu kan hmu tam zel anga, PDRDG erawh kan hmu tlem zel thung dawn tih a sawi. “Covid avanga sum harsatna kan tawh dan hi sawi nep theih a ni lo. Khawvel a buai a, India a buai a, kan state kan buai takzet a. Hmuh tur anga beisei hmuh loh a tam avang hian vawiin thlengin sum chungchangah sawrkarin harsatna a la tawk a, hmasawn zawnga insiamrem chhoh zel a ni,” MNF general secretary hian a ti.