Cristiano Ronaldo Birthday Special: Kum, stats, goal leh hlut zawng

Cristiano Ronaldo Birthday Special:
Kum, stats, goal leh hlut zawng
Kum 1985-a piang Cristiano Ronaldo tan nimin, February ni 5, Ningani kha a pian cham niin, chu mi pual chuan he Portuguese superstar hi kan han bihchiang leh lawk dawn a ni.
Match 226 khela goal 143 thuna international football history-a top goal scorer ni mek Ronaldo hi mipate zinga World Cup hrang pangaa goal thun kim vek thei awmchhun niin, follower maktaduai 670 neitu hi Instagram-a mihring zuitu ngah ber a ni mek bawk.
Real Madrid leh Manchester United star hlui hi tunah club football khelin Saudi Arabia a la thut chilh mek a; a sulhnu, a thiamna leh theihna a thlir a, ‘football chanchina player ropui ber’ inti ngam ngat a ni!
Nikum February thlaa Spanish television channel La Sexta an tihin an kawm tumin Ronaldo hian veikhawr ni lo mah se football history-a ke veilam hmanga goal thun tam zual 10 zinga a tel thu leh footballer piang chhuak tawh zawng zawng zinga complete player ni chiang ber a nih thu a sawi!
“Ka lu ka hmang thiam a, free kick-ah ka tha a, ka tuan a rang a, ka tlan chak a, ka khawng a, zuan lam ka ti thei bawk a, kei anga footballer tha tehna hrang hranga tha vel vek kim hi ka la hmu lo,” a ti!
Kum engzatnge a nih tawh?
February 5, 1985 khan Madeira thliarkar awmkhawm khawpui Funchal-ah lo piangin, a lai-ah hming chu Cristiano Ronaldo dos Santos Aveiro niin, a pain a fa hming koh hminga ‘Ronaldo’ tih a telh chhan hi US President hlui leh Hollwyood actor hlui ni bawk Ronald Reagan a ngaihsan vang a ni.
Rawlthar kum 15 mi lek a nih laiin natna vang tak ‘tachycardia’ an tih chu a vei avangin lung zai (heart surgery) a hmachhawn a, mahse, zaipui a tawh atanga ni reiloteah football a khel zui leh thei nghal!
MANCHESTER UNITED (2003-09)
Mipa naupang a nih lai kum 1992 atanga 1995 chhung khan Ronaldo hi Andorinha tan a khel a, a hnuah Nacional youth team-ah ziahluh niin, kum 2002 khan Sporting CP-in an senglut ta a ni.
Chu Portuguese rawlthar chu Manchester United manager a nih laiin Alex Ferguson khan a lo hmu khiau a, August 2003 khan pound maktaduai 12.24 (USD 14.80 million)-in a senglut ta a ni.
Kum 2006-07 khan United kutah Premier League title a lut a, kha mi kum khan Ronaldo chu England Footballer of the Year-a thlan a ni.
2007-08 season-ah phei chuan Ronaldo ho hian Red Devils chuan League leh Champions League an phir a, goal 42 thun tling Portugal international chuan Europe top scorer ni chungin season a khar a; 2008 season-ah Ballon d’Or chawimawina a dawng zui ta nghe nghe.
2008-09 lamah pawh United chu Premier League title leh League Cup lakpui lehin, Old Trafford club tana a khelh chhung khan game 291-ah goal 118 a thun tling.
REAL MADRID (2009-18)
Kum 2009 a herchhuak a, an mit it zawng hlah zen zen lo Real Madrid an lo lang a, pound maktaduai 80 zetin an lei chhuak a, a hun lai khan world record fee a ni chiang hle.
2011-12 La Liga season-a Real-in title an lak tum khan Ronaldo hian goal 46 tehreng a thun tling!
2013-14 season-a Spanish giants-in an club chanchina a vawi 10-na atana European title an lak tum khan Ronaldo hian Champions League goal 17 a khung a, Madrid champion theihna kawngah a thawhhlawk ngang mai.
Kum 2016 final penalty shootout-ah result hriltu spot kick thunin Atletico Madrid lakah Real a chakpui leh a, Bernabeu club kutah a vawi 1-na atan Champions League title a lut.
Kum 2013, 2014, 2016 leh 2017-a Ballon d’Or dawngtu Ronaldo hi a goal 451 tihluh hmangin Real Madrid all-time top scorer a ni.
JUVENTUS (2018-21)
Turin club-in July 2018 khan euro maktaduai 100 zetin an lei chhuak a, kum 30 pel tawh player zinga man to ber a ni leh.
Juve tan khan goal 21 thunin, a zawna Scudetto pariat an lak tlinna kawngah Juventus a pui tha leh hle a, kha trophy hmang khan England, Spain leh Italy rama league title la vek thei player hmasaber a ni.
2019 Best FIFA Men’s Player Award semnaah pathumna niin, Lionel Messi leh Liverpool star Virgil van Dijk a pha lo.
2019-20 Serie A season-a Juventus a champion-pui leh tumin goal 31 nen league goal khung hnem ber dawttu a ni.
2020-21 season-ah goal 29 thunin Serie A golden boot dawng bawk mah se Italian giants chu league title a lakpui zo lo a, palina a nihpui.
Inelna hrang hrangah Juventus tan khan match 134 khelin goal 101 a thawh tling.
MANCHESTER UNITED (2021-22)
August 2021 khan a lar chhuahna Old Trafford-ah a kirleh a, a kumte a lo tam ve ta bawk nen Premier League club-in an leina man kha euro maktaduai 15 vel chauh a ni ta a, mahse, a khelh that dan azirin euro maktaduai riat pekbelh leh tura inremna ziah a ni.
United thuam a inbel leh tum hian English club tana Champions League season khat chhunga a zawna match nga chhung goal thun thei hmasaber nihna a chang leh.
England-a a kirleh lai hian goal 807 thun tlingin professional football history-a goal khung hnem ber a ni.
A club hluiin beiseina sang tak nen an talbuaina tanga chhanchhuak tura an beisei laiin Manchester United chu Champions League round of 16 atangin Atletico Madrid-in an pet chhuak a; Premier League-ah parukna an luah pha chauh bawk!
He season khat lek chhung hian goal 18 thunin Premier League goal thun hnem pathumna a ni a; inelna hrang hrangah belhkhawmin goal 24 a kawl tling a, United bikah an team top scorer a ni a, Manchester United Sir Matt Busby Player of the Year award a dawng.
Mimalin chechhe hran lo mah se a club chuan 2009-10 campaign hnu lama a vawi khatna atan trophy la loin season an khar!
AL NASSR (2023)
December 2023 a herchhuah chuan Europe atanga chhuakin Saudi Arabian club Al Nassr chuan kum hnih leh a chanve daih contract an ziahpui a, Manchester United kha free agent ni chungin a chhuahsan.
Arab club hausa tawntaw Al Nassr hian euro maktaduai 200 (USD 214.04 million) chuang hlawh turin an thlemlut a, football history-a player hlawh hnem ber a ni!
PORTUGAL CAREER
August 2003-ah a Portugal debut nghak chhuakin, Euro 2004-ah a ram chu runners-up a nihpui nghal.
Ronaldo hoin Portugal chu 2010 World Cup-ah khan Spain-in last 16 stage-ah an pet chhuak.
2014 World Cup-ah Ronaldo a inhliam a, Portugal-in group stage an paltlang zo lo.
Kum 2016 a herchhuah chuan final-a si khat faia France hnehin a vawi khatna atan Portugal kutah European title a lut ve ta nge nge a, Ronaldo international title hmasaber a hmin.
2018-19 Nations League final-ah captain ni chungin Ronaldo hian Netherlands lakah Portugal a chakpui.
Euro 2020-ah khan France laka a goal tihluh hmangin Portugal tan goal 109 a khung tling a, international goal thun hnem ber Iran captain hlui Ali Daei record a nihrualpui.
Euro 2020 Golden Boot a dawnna kawngah goal nga thunin assist vawi khat a siam chhuak tling bawk.
September 2021 a ni a, World Cup qualifiers-a Ireland an tum tuma a goal hnih tihluh hmangin Daei record ropui chu a khum ta nge nge a ni.
Qatar 2022-ah khan a tum ngana atan Portugal tan World Cup a khel a, Group H match pakhata Ghana laka a penalty chhuihluh hmangin World Cup tournament vawi ngaa goal thun kim vek thei player hmasaber a ni.
Mimalin ropui leh vet vet hle mah se quarter-final stage-ah Morocco ngam loin Portugal a tlakpui!

(chhunzawm tum ang…)