Cristinao Ronaldo a hausa ber

Inrinni zan khan Sporting Clube de Portugal chuan Portuguese Primeira Liga 2024-25-a an match hnuhnung ber an khel a, 2-0 a an mikhual Vitória Guimarães hnehin an champion nawn leh.
Champion lai Sportling CP hian champion nawn leh turin an mualah chak ngei an mamawh a, an mualah an chak a nih chuan an hnuai chiaha awm Benfica chak pawh ni se point inzatah Sporting hi an champion tho dawn. Chak an mamwh em vangin Estádio José Alvalade-ah entu an thahnem hle. League khar niah an duhthusam pahnih a thleng rual; an mualah an chak laiin Benfica chu Braga lakah an chak zo lova, Sporting CP hi an champion nawn ta a ni.
Champion nawn leh tura chak ngei ngei an mamawh vangin Sporting hian an mualah chak an tum hle a, mipui thlawpna tha tak nen an mualah an khel tha viau nghe nghe. Chak mamawh viau mah se chawlhlawk hmain goal an thun thei lova, ngaih ngam lo takin chawlhlawk an hmang.
Chawlhlawk hmain goal thun thei lo mah se chwlhlawk hnu lamah goal an thun ta thuai thung. Pedro Gonçalves chuan minute 55-naah hmahruaina goal a thun a. Hun tawp dawn hnaih minute 82-naah goal thun thei tak Viktor Gyökeres chuan an goal hnihna a thun zui leh a, an hmahruaina a tizau. Arsenal player thar ni maia tura ngaih Gyokeres goal thun hnu hian goal dang a luh belh thei tawh lova, Sporting CP chu an champion nawn leh ta a ni. Sporting hi Portuguese Primeira Liga-ah an champion zawn vawi hnihna a ni a, kum 1953 leh 1954 khan an lo champion zawn tawh a. An champion zawn theih loh vang vang hnuin 2025-ah an champion zawn leh ta bawk.
Portuguese Primeira Liga 2024-25 khelh zawh taka champion Sporting Clube de Portugal hian khelh 34 atangin vawi 25 hnehna an chang a, draw vawi 7 neiin, tlawm zawkah vawi hnih chiah an tang a, point 80 an hmu. An khingpuite lamah goal 88 lai an thun laiin goal 27 chiah an chhuah a, goal difference-ah an tha hian an dinhmun a titha leh zual. Inrinnia season an khar takah khan Benfica nen an ineltawk hle a, league tawp ni thlengin champion tur zawk a chiang thei lo reng a. Match hnuhnung berah Sporting in hnehna an chan vangin champion a chiang ta chauh a ni.
Sporting CP an champion theih nan Viktor Gyokeres a thawhhlawk hle. Arsenal in lak an tum mek Gyokeres hian goal 39 lai thunin top-scorer a ni a, amah hnaih bertu aiin Sweden forward hian goal 10 zetin a thun tam zawk. Sporting CP hian league title 21 an la tling ta chiah a, season hnuhnung, season nga chhungin vawi thum an champion na a ni tel bawk. Champion nawn leh turin 2024-25 season ah bul an tan tha viau a, an match hmasa 12 ah an chak vek. An chet that viau lai hian an manager Reuben Amorim chuan Manchester United enkawl turin a chhuahsan. Amorim chhuah vangin an khel tha tluang lai khaihlak det mah se Joao Pereira hnuaiah insiamthain kawng dik an zawh leh thuai a, an champion leh ta nge nge a ni.