Croatia Nations League squad-ah Modric

Kum 2018-a Ballon d’Or chawimawina dawngtu Luka Modric chu Uefa Nations League campaign-a match hmasa lam khel tur Croatia 24-man squad-ah telh a ni leh.
Thla thar maia kum 39 tling chho tawh tur Real Madrid captain Modric hian kum 2006 daih tawh khan kum 20 mi lek niin Croatia tan a khel tan a, tun thlengin ram tan game 178 a khel tling tawh.
Thla hmasa maia Spanish champion Real Madrid-a kum khat daih contract pawtsei Modric hian kumin Euro-ah khan Croatia match thum a khel kim vek a, mahse, group stage an paltlang zo lo a, Modric chuan international football a chawlhsan ve tawh mai dawn em tih zawhna a awm reng laiin Croatia squad-ah telh leh a ni.
A team-mate hlun pahnih Domagoj Vida leh Marcelo Brozovic-te chuan international football an chawlhsan thu an puang tawh a, chutih laia a captain-in ram tana khelh chhunzawm a la duh chuan head coach Zlatko Dalic a tilawm hle a, “Khelmual chhung leh pawnah kan chakna kulhpui a ni,” a ti.
Croatia hi Nations League khelh chhoh leh turah League A lamah awmin, September ni 5 khian Portugal an luhkhung dawn a, nithum hnuah Poland an mikhual chhunzawm leh ang.