CS-in Champhai a tlawh

CS-in Champhai a tlawh
Chief secretary Khilli Ram Meena kaihhruaiin Champhai district-a sawrkar pisa hotute an thukhawm.
Chief secretary hian Champhai district-a raltlante dahkhawmna hmun pahnih – Champhai Zote ITI Camp leh Bethel Camp Zokhawthar a tlawh a. Indo-Myanmar ramri a tlawh bawk. Bawrhsap VL Remliana leh sawrkar hotu dang bakah Sub Hqrs YMA hruaituten an tawiawm a. Sawrkar hotute leh tlawmngai pawl hruaitute hian raltlan enkawl kawnga hma an lakna leh harsatna an tawh an hrilhfiah a. Champhai Zote ITI Camp-a awmte chu Sub Hqrs YMA ruahman angin Champhai Zion Vengah sawn tum mek an ni tih an lo hrilh.
Champhai Zote ITI Camp-ah hian tunah raltlan 317 – puitling mipa 169, hmeichhia 62 leh naupang 86 an awm a. Bethel Camp Zokhawtharah hian mi 399 – puitling mipa 110, hmeichhia 177 leh naupang 112 an awm a ni.
Hemi hnu hian district-a sawrkar pisa hotute nen an inkawm a. District pawhtu kawngpui tha tak an nei chu chief secretary hian lawmawm a tih thu sawiin, Champhai mawina leh kawng tha chuan mipui hmasawnna leh nun awlsamna thlen se a duh tih a sawi a ni.
Champhai bawrhsap chuan chief secretary-in pisa a luah hnu reilotea Champhai district a tlawh chu lawmthu a sawi a. Champhai district dinhmun a sawizau bawk.
Champhai district chhunga Handholding Policy kalpui dan, Myanmar ramri chungchang, bawlhhlawh sawngbawl dan (solid waste management), African Swine Fever chungchang, power supply dinhmun leh hriak atana sawr chi thlai thar chungchang sawiho a ni.