CS-in Serchhipa sawrkar hotute a kawm
Chief secretary Khilli Ram Meena chuan Inrinni khan Serchhip a tlawh a. Serchhip district-a sawrkar hotute nen an inkawm.
Serchhip district chhunga sawrkar scheme leh programme hrang hrangte tangkai taka kalpui a tul tih chief secretary hian a sawi a. Hmasawnna atana hmalakna pawimawh – hriselna, zirna, leh hmasawnna ruhrel dinna tur project hrang hrang dik taka kalpui leh, a hun taka zawhfel a tul, tiin, official-te chu tualchhung mite harsatna tawh chingfel turin an inpeih reng tur a ni tih a sawi.
Mipui tana rawngbawlna chu sawrkar hnathawkten hna an thawh chhan a ni tih hre turin a chah a. Hmasawnna hna thawh a hun taka zawhfel a nih theihnan department hrang hrangn tanrual a, thawhhona tha an neih a pawimawh tih Khilli Ram Meena hian a sawi. Serchhip district chu literacy rate-ah India rama sang ber a nih avangin, thalai lehkhathiamten eizawnna hlawk leh tha zawk an neih theihnan zirtir uar turin a chah a. Mizoram sawrkar flagship programme – Handholding Policy pawh tihlawhtling bertu district nih tum turin a fuih bawk.
District bawrhsap Paul L Khuma chuan Serchhip district nihphung leh dinhmun, hmasawnna hna hrang hrang sawrkar department ten an kalpui dan a sawi a. District tana hlawhtlinna an hmuh leh hma an hruaina, harsatna an tawh thenkhat powerpoint hmangin a sawifiah.
Serchhip SP MS Dawngkima pawhin Serchhip Police dinhmun leh district chhunga out post & checkpost dinhmun leh an inrelbawl dan tlangpui, dan leh thupek kenkawh kawnga Serchhip Police chet dan leh hmalak dan report a pe a ni.
Chief Secretary hoa thutkhawmah hian Serchhip district-a head of offices an tel kim a. Serchhipa sawrkar department hrang hrang hmalakna leh hmachhawp mek sawiho a ni.
CS-in Serchhipa sawrkar hotute a kawm
Get real time updates directly on you device, subscribe now.