CSS employee-te chungchang hi….

All Mizoram CSS Employee Coordination Committee (AMCECC) ngenna sawrkar lamin an tihpuitlinsak theih loh avangin an lo ruahman lawk tawh angin CSS employee-te chuan lungawilohna lantirin ni thum chhung atan mass casual leave an la a. Hei hian damdawi in hrang hrang bakah development works khawih department hrang hrang pawh a nghawng nasa viau mai.
Mizoram sawrkar hian CSS employee-te dah ngheh theihna dan “Goverment of Mizoram Regularisation of Centrally Sponsored (CSS) Employees Scheme, 2024” chu siamin June 18, 2024 khan Mizoram Gazette-ah tihchhuah a ni a. A hnu thla 4-na, October ni 21, 2024 khan DP&AR chuan Office Memorandum tichhuakin Checklist 12 a tarlang a. Hei hi AMCECC lam hian an zirchian hnuah point pathum Serial No. 3 – Copy of advertisement to determine whether proper recruitment procedures were followed by the recruiting agency at the time of initial engagement tih te; Serial No 4 – Copy of constitution of approved DPC that recommended appointment/engagement of the CSS employees tih leh Serial No 5 – Copy of the DPC Meeting Minutes recommending appointment/engagement under the scheme, tihte chu siam tha turin sawrkar an phut ta a ni.
Sawrkar nen an indawr lauh lauh a, an beisei ang an hmuh loh avangin AMCECC hian kumin April 15,16,17 chhung khan pen/tool down strike an kalpui a. Khami tum khan ‘no work, no pay’ tih pawh a lar viau kha. Hemi hnu hian mass casual leave lak tuma an inruahman laiin sawrkar hotute nen inbiakna an nei a, mass casual leave lak chu an thulh a. Hemi tuma MCL an thulh chhan hi point pali a awm a, chungte chu – 1. initial appointment chu service seniority chhiarna atan hman theih a nih tur thu an dawn avangin. 2. DPC chungchangah CSS Scheme-in a phut ang taka CSS concerned Department in proper recruitment process anga lak chu pawm theih a nih thu DP&AR hotute atanga an dawn avangin. 3. Corresponding post chungchangah DP&AR Minister chuan Representation thehlut tura a tih ang leh a tul anga bawhzui sak zel a inhuam avangin. 4. Adviser to CM (Political) chuan ‘no work no pay’ order chu sut leh tura chak taka hmalak a tum avangin.
Hun a kal zel a, an beisei anga thil a fel tak mai loh avangin, Regularisation of CSS Employees Scheme 2024 a taka hman thuai leh siamrem ngai siamrem sak tura phutin tunah hian Mass Casual Leave hi an la leh ta a ni ber. He scheme hi AMCECC affiliated association leh member ni loten hman ve an remti lo, tih an sawi bawk a ni.
Khai le, CSS employee-te pawimawhzia chu mass casual leave an lak atang hian a lang chiang viau mai a. Kum tam tak an hnaa experience tha tak lo nei sa tawh an nih avangin, an hna thawh meka dah ngheh atan iaiawm loh tak tak an ni ang tih a rinawm. Sawrkar pawh hian duhsak zawk awm tak an ni.