CSS Hindi zirtirtu aikal la thlen

CSS hnuaia Hindi zirtirtu lak zinga aikal la list chu Mizo Hindi Zirlai Pawl chuan School Education minister Dr Vanlalthlana hnenah an thehlut.
Ningani khan Mizo Hindi Zirlai Pawl (MHZP) chuan zirtirtu aikal la zingah CSS Hindi zirtirtu thahnem tak an awm tih thlenin, aikal la zingah harsatna bik (genuine case) nei si lo, sawrkar dan zawm lote chungah hma an la zel tur thu an sawi. Sawrkar leh department pawh theihtawp chhuahpui zel tum a ni, tiin, aikal la hming an thehluh chu ngun takin a enzui dawn tih an sawi a ni.
Education minister hnena an thu thlen zingah, “Internal Arrangement hmanga deputy director (H) charge latu a pension tak avangin Hindi stream a nih ang ngeiin Hindi Education Officer (HEO) atangin seniority angin charge laktir leh nise, tiin an thlen.
Samagra Shiksha Office-ah Hindi stream tan hmalakna tur tam tak a awm tih an sawi a. Document enfel kawngah tun aia chak zawka hma lak a nih theih nan HEO-te deputation-a dah a, SPD Samagra Shiksha Office-ah assistant state project director, Hindi tan post siamsak a tul tih minister hi an sawipui bakah ziakin an thlen a ni.
Mizoram Hindi Training College (MHTC) ah faculty indaihlohna leh ‘Yoga subject’ chungchangah zirlaite harsatna leh mamawh an sawipui bawk a. Yoga subject-a MHZP leh MHTC inrem lailawkna chu Education minister an sawipui a. Yoga chu kan sakhuana nen a inhal avangin MHTC hmalakna a thlir reng a, zirlaiteah engkawngah pawh harsatna a thlen a nih chuan an dodal dawn tih an sawi.
MHZP chuan Govt Primary School-ah Hindi zirna kalpui leh a tul thu sawrkarah a lo thlen tawh thu an sawi a. Private school ten an kalpui mek angin Govt P/S atanga 3 languages formula – English, Hindi leh Mizo zirna ngaihpawimawh a nih chuan zirlaite tan bakah sawrkar sum indaih lohna leh zirtirtu indaih lohna pawh CSS Hindi zirtirtute atangin nasa taka a chhawk an ring tih an sawi a ni.