CSS hnuaia thawkten hna thawk loin Mizoram sawrkar nawr dawn

CSS hnuaia thawkten hna thawk
loin Mizoram sawrkar nawr dawn
Centrally sponsor scheme (CSS) kaltlanga Mizoram sawrkar hnuaia thawkte chuan an thil ngen tih hlawhtlin tumna a awm lo nia hria in ni thum chhung hna thawk loa lungawiloh lantir an tum.
All Mizoram CSS Employees Coordination Committee (AMCECC) thuchhuak chuan, kumin March 27-a thuchhuah hmanga sawrkar an kohna chuan awmzia a neih tak loh avangin inthlahrung tak chungin sawrkar laka lungawilohna – pen/ tool down strike chu 2025 April 15,16, 17 chhung hian neih nise an ti a. Damdawi ina emergency duty-te chu hriatthiam nise an ti. Mizoram sawrkar hnuaia CSS employees-in lungawilohna an lantir avanga mipuiin harsatna an tawk a nih pawhin hriatthiamna an ngen tih a sawi.
Sawrkarin ‘Govt. of Mizoram Regularisation of CSS Employees Scheme 2024’ a siamsak avangin an lawm hle a, a hlawhtlinna nghakhlel taka an thlir mek laiin, DP&AR (ARW) atanga 2024 October 21-a office memorandum chhuaka checklist chuan harsatna nasa tak siamsakin department thenkhat proposal hnawl a ni ta zel a. An harsatna hi sawrkarin a rang thei ang bera ngaihtuah sak a, department hrang hrang hnuaia CSS thawkte dinhmun leh harsatna tawh chinfel sak a, hma laksak turin an ngen tih a sawi a ni.
Pen/ tool down strike hian awmzia a neih loh chuan an kal zel dan tur ngaihtuah an tum tih an sawi a. Hma an lakna avanga CSS employees zing ami tupawhin harsatna tawk an awm a nih chuan AMCECC-in a tul angin na takin hma a la zel dawn tih a sawi a ni.
AMCECC thil phut:
8 Provisional employees /state contract-te tan an mamawh anga Departmental Promotion Committee (DPC) awlsam taka sawrkarin a siamsak thin ang hian, CSS employees tan DPC siam ngaiah leh corresponding post siamrem leh a tul dan azira equivalent /temporary post siam ngaiah siamsak turin kan phut.
8 CSS hnuaia thawkte hi hmasawnna hna hrang hrang thawktu leh sawrkar kutke ber zing ami kan ni a, amaherawhchu, kawng hrang hrangah enhran leh hlamchhiah kan ni fo thin hi na kan ti. Mizoram hmasawnna atan thahnemngai taka kan thawh angin hamthatna leh kan service-ah min duhsak ve turin kan phut.
8 Mizoram sawrkar hnuaia a ngheta thawkten a hun taka hlawh an lak thin laiin, CSS hnuaia thawkten hlawh kan la mumal lo fo thin a. CSS kan kalpui danah tun aia chak lehzualin central atanga fund nawrchhuah a nih theihnan hma min laksak turin kan phut.