CSS thawktuten CM an ngaichang Sawrkar zirtirtute lungawilo ve dawn

Sawrkara thil phut neia ni thum chhung hna thawk loa pisa kai CSS hnuaia thawktuten chief minister thu hla an ngaichang mek a. A thu tiam dan azirin lungawiloh lan tir tawh lo thei an ni a, chuti a nih loh chuan a ruala chawlh lak an tum. Sawrkar zirtirtuten an chunga sawrkar rorel dan lungawithlak loh tiin thil phut neia lungawiloh lantir an tum mek. All Mizoram CSS Employees Coordination Committee (AMCECC) chuan sawrkar laka an thil phut tihhlawhtlin ngiatin April 15-17 chhung khan pisa kai siin, hna thawk loin nawrh an huaihawt a. Hei hian awmzia a nei lo a nih chuan April 21-23 chhung mass casual leave laa nawrh chhunzawm an tum tih an lo sawi tawh a ni.
Ningani khan political adviser to chief minister Lalmuanpuia Punte chuan AMCECC hruaitute hi kawmin, an harsatna chu chief minister a sawipui tur thu leh chief minister an hmuh theih hun remchang siam a nih tur thu sawiin, an harsatna chinfel a nih theihnan nawrh an kalpui mek sut a, dawhkan kila tha taka sawiho a pawimawh tih a sawi a ni.
The Aizawl Post thudawn danin, inbiak hnu hian CM adviser hian chief minister hi sawipui a tum a. A lo buai deuh avangin DP&AR minister K Sapdanga nen inbe tura a lo rawn angin Ningani tlai khan an inbia a. Minister hian an thu ngaihthlak sakin, cabinet-a chhawpchhuah turin chief minister a lo sawipui tur thu a lo hrilh a ni.
AMCECC hian DP&AR minister hi chief minister hmuhpui dan ngaihtuah pui turin an ngen a. A lo ngaihtuah tur thu in a chhang. “Kan thil duh hi tih hlawhtlin harsa a ni lo. Chief minister hian kan duhdan a hria tih min hrilh se, cabinet-ah tih hlawhtlin dan ngaihtuah turin kan lo sawi ange, tih min tiam se, chu bak kan beisei lo,” tiin AMCECC hruaitu pakhat chuan The Aizawl Post a hrilh.
Hei hi tihhlawtlin a nih loh chuan, an lo ruahman lawk tawh angin mass casual leave lak hi an tih mai a ngai dawn tih a sawi bawk.
Hetihlai hian CM political adviser nen an inbiak tuma an thusawi thenkhat chu social media lamah a ni lo zawnga thehdarh a awm tih AMCECC hruaitu hian sawiin, pawl hruaituten an member-te phatsan a, an ngheh theihna tur sawi anga tih darh chu thudik lo a ni a, an member zingah kum hnih thum vel bak service nei tawh lo te an awm a, chu’ng mite chu nghet ve hman hram se, ‘sawrkar hnathawk nghet’ angin chawl ve hram se an sawipuina zawk a ni tih an sawi a ni.
Mizoram sawrkar school zirtirtu inzawmkhawmna Mizoram Govt. School Teachers Union (MIGOSTU) chuan sawrkara thil phut neiin April 21-25 chhung hian lungawiloh lantirin badge dum bel an tum thu an sawi ve bawk.
Sawrkar hmasa in dinhmun sang zawka zirna in a hlankaite tuna sawrkarin dan siamthat ngai leh fel lo chhuanlama a paih leh tak chu provincialised status-a dah let an phut a; kum 20-30 chhung high school leh middle school headmaster ni tawhte zirtirtu pangngaia an tlak theihna tur a siam thar bakah zirlai enrolment chungchangah thingtlang leh khawpui a hrutrual ngawt chu an duh lo tih an sawi.
The Aizawl Post zawhna chhangin MIGOTSU hruaitute chuan, sawrkar thuneituten cabinet-a ngaihtuah tur anga an sawi hmuh reng avangin an ngaichang rei a, a bawhzui erawh a muang hle tih an sawi. Lungawiloh an lantirnaah zirlaite tawrh loh dan ngaihtuah hram hram an tih an sawi bawk.
AMCECC thil phut:
8 Provisional employees /state contract-te tan an mamawh anga Departmental Promotion Committee (DPC) awlsam taka sawrkarin a siamsak thin ang hian, CSS employees tan DPC siam ngaiah leh corresponding post siamrem leh a tul dan azira equivalent /temporary post siam ngaiah siamsak turin kan phut.
8 CSS hnuaia thawkte hi hmasawnna hna hrang hrang thawktu leh sawrkar kutke ber zing ami kan ni a, amaherawhchu, kawng hrang hrangah enhran leh hlamchhiah kan ni fo thin hi na kan ti. Mizoram hmasawnna atan thahnemngai taka kan thawh angin hamthatna leh kan service-ah min duhsak ve turin kan phut.
8 Mizoram sawrkar hnuaia a ngheta thawkten a hun taka hlawh an lak thin laiin, CSS hnuaia thawkten hlawh kan la mumal lo fo thin a. CSS kan kalpui danah tun aia chak lehzualin central atanga fund nawrchhuah a nih theihnan hma min laksak turin kan phut.
MIGOTSU thil phut
8 2023 August 1-a sawrkarin provincialised status-a a hlankai school, 2024 June 18-a cabinet-in dan siamthat ngai leh fel lo chhuanlama a hnuhlet hi a bo a bang awm loin provincialised status-ah dah let rawh se.
8 Zirlai enrollment crtiteria-ah thingtlang leh khawpuiah tehfung inang reng siam hi thingtlang school tan engtikah mah provincialised a nih ve theih lohna tur a ni a, dan tha lo tak a nih avangin siamthat leh kan phut.
8 High school leh middle school-a headmaster, sawrkar pawmpui DPC-in an thawh tirha a lak, sawrkara an tlukpuite basic pay leh half allowance hmanga a enkawl senior grade leh selection grade hiala kaisang tawh, mualpho taka zirtirtua an tlak leh vekna tur dan hi a rang thei ang bera sut ni rawh se.