‘Culture based tourism’

Tun hnai khan, PRASHAD Scheme hnuaia Development of Basic Amenities, Vangchhiaa sakna tur lungphum phumtu tourism minister chuan ‘culture based tourism’ kalpui a nih tur thu a sawi a. Khualzinte hian a khaw mite nunphung an hmu duh thin tih sawiin, an khua awm dan anga lo awm ve mai kha khualzinte tih thin dan a nih avangin anmahni lo danglam a ngaih loh thu a sawi a ni.
Mizoram tlawha lo zin thin khualzinte hi, a nihna takah chuan kan ram dinhmun hre saa lo zin an ni thin. Mizoram chu India rama state hnufual zual northeast state-te zingah pawh hmun kilkhawr bera awm leh, state dangte tlawhpawh loh pawl a nih bakah, thawh chhuah nei tlem, mahni intodelh lo, economy lamah pawh sang lo tak kan ni tih hre saa lo kal an ni thin a. Hmasawnna ruhrel infrastructure ropui tak tak, phai ram anga motor kawngpui four lane thlur seng sung ang te, building ropui tak tak leh industry lian tak tak awmna tur a ni lo tih hre saa lo kal an ni. Mizoram an rawn tlawh chhan tlangpui hi chu, khuarel mawina (natural beauty) te, sik leh sa nuam (moderate climate) te, kan hnam nunphung leh tih dan rawn hmuh a, kan tih dan ang rawn tih ve te an duhin an chak thin a, kan nih ang ang (living culture) kan lo lantir mai kha a hlutna a ni a, chu chu ‘culture based tourism’ in a kawh ber chu a ni.
Chutih ruala kan ngaih pawimawh tur pakhat chu, thianghlima leh faina (sanitation&hygiene) hi a ni. Tuna ei leh bar kan sawngbawl dan leh hmun leh hma enkawl kawnga kan kalphung (abikin khaw kar kawnga hotel leh restaurant) hi chu ennawna siam that ngai tak a ni. Khualzin thenkhat chuan an sawi chhuak zauh zauh nghe nghe. He lamah hian nasa taka tan kan lak a ngai a, traffic discipline lama kan thang mawi awng bawk hian, ‘Mizoram chu ei leh in sawngbawl kawngah pawh an thianghlimin felfai’ tih tur khawpa kan inbuatsaih a pawimawh hle a, chu chu tourist kan hipna tur point lian tak pawh a nih phak a rinawm.
Hetih rual hian, tuna ‘living museum’ kan kalpui ang hi tourist destination lar zualah te hi chuan kalpui theih zel ni se a duhawm hle a. Khualzinte fuankhawm tamna hmun bikah te phei chuan, tourist welcome programme hrim hrim te pawh lo huaihawt a, campfire te lo neihpui te pawh a tha hlein a rinawm bawk.