CURRENT A AWM LO

K. Hmingthankaia
Mizorama Electric current, (power) kan khaihlak fo chhan fumfe taka hre pha chin hi chu, anmahni department, Power & Electricity (PE) leh, Sawrkar deptt.te hnathawh dan leh Sawrkar kalphung hre pha chinte hi an ni mai a. Mi tam zawk hi chuan current awm loh fo hian, a chhan ber hre si lo hian hreawm kan tiin, kan thaw a pika, awmhmunah kan lo thinrim ve hle ringawt thin a, Sawrkar lai apiang kan lo dem viau zel thin a nih hi tir’u. A thinrimthlak thin reng a ni. Kan rama current mumal lo lutuk hi, a khawilai ber hi nge dik lo leh siam t hat ngai, tu mawhphurh ber nge tih phei chu kan hre tak tak vak chuang si lo. Sawrkar lahin fiah fekfawka sawifiah a nei ngai hek lo.
Mi thiam leh a hre zawkte sawi tur niawm tak hi kei hian ka hriat dan dan mawlmang takin ka’n sawi ange. Current awm loh chang pawha kan thinrim lutuk turte a lo ziaawm phah mahna.
Phai atanga kan lakluhna leh Zoram hmun danga kal zel hruipui lian leh, mipui hman tura Sub. station atanga kan pekchhuahna hruite hi an hlui hlawm tawha, hei hian buaina tam tak a thlen thin. Vengtin, a bikin Aizawla mahni Veng theuh min chawmtu Transformer-te hian a hmangtute min chawm zo tawh lo. Chumi avang chuan zankhatah pawh vawi tam tak siam a ngai thin. A hrui chahna ngaia chat leh thin pawh hi a hrui leh a zawmna hrui hlui tawh vang a ni. Veng pakhat emaw, hmun pakhatah emaw a chhiata, feeder pakhat chawm veng zawng zawng tihthim a ngaih chhan chu, main swicht leh gang tam tawk loh vang a ni. Transformer hlui leh hlui loh lam ai mahin, transformera tel tur hmanruate a hluiin a chhe tawh ni mai lovin, a ngai zat a kim lo nasa deuh vek. Khawilai ami pawh a enkawltu, chhun zan zawma viltu, zanlai thleng thlenga Veng hrang hranga tlankual renga, a taka hna thawktu Veng tin khawtin, site office tinah an indaihlo em em vek hi a pawi em em bawk a ni. Tuikhuah leh khuah loh lam a la ni lo a nia aw.
Tun dinhmuna kan ziaawm deuh hlek dan tur nia langte-Mizoram dung leh vanga hrupui lian hi thlak vek tum niin ka hria a, tunah hian chhimlam km. engemaw zat chu an thlak tawhin ka hria. Ka hre diklo thei bawk.
Feeder pakhat ringte a ruala kan thim thup thup loh nan, main swicht leh gang engemaw zat dah belh a ngai. Vengtinin transformer neih belh emaw, kan hman lai aia volt sang zawk kan neih chuan a ziaawm em em dawn. Mahse, a dahna tur hmun a vang tawh, Vengin kan ngaihtuah a ngai. Heng lo pawh hi kan ziaawm deuhna tur dang a la tam ang.
Hruipui lian leh Vengchhunga hrui te zawk zam hi thlak a ngaih chu thuhranah dah hrih ila, tuna Vengtinin kan tih theih chu, min chawmtu transformera main swicht leh gang dah belh. Tin, transformer dah belh emaw, volt sang zawk dahin kan ziaawm dawn.
Nimahsela, eng anga khawl leh hmanraw thar leh tha pawh nise, a taka enkawltu technician-te, chhun zana viltu field staff/worker, (MR) tam tawk englai pawhin an awm a ngai. Tun kan dinhmunah phei chuan hnathawktu an indaih a ngai nasa lehzual a ni. Min viltu theuh site office-a thawktu, field worker-hi tun ai hian indaih se chu kan thim zing lutuk leh thim rei lutuk hi a ziaawm dawn chiang.
Khitiang ka thil sawi zawng zawng, lian tham deuh leh te tham deuh bakah, thil dangte pawh, current kan neih ziaawm deuhna tur hi chu Sawrkar leh PE Deptt. hian an hai lova, an hrechiang zawk em em vek a ni. Nimahsela, Sawrkar kaltate leh tun Sawrkar pawh hian thil tih tak takna tur pawisa a nei lo a ni. Sawrkar leh Department lam atang chuan, sub. division mal emaw, site office mal emaw, Veng mal bik emaw chauh tana budget siam emaw, ruahmanna siam leh bungraw order ngawt emaw a theih si loh. Mizoram pumpui Power &Electricity Department mamawh zawng zawng phuhru tur leh tichangtlung tur chuan, Sawrkar hian sum a nei lo a ni. PE. lama min bialtu SDO ka titi pui chuan, “ Kan mamawh leh tulte chu kan hria alawm, hotute hnenah pawh kan thlen thin, mahse, pawisa ber a awm si lova, tihngaihna tak a awm lo a ni. Mipui hian tunhma atang tawhin Sawrkar hi an dem vak vak a, a chhung atang hian Sawrkar pawisa neih loh hi kan hre si a. Tun ZPM Sawrkar phei chu mipui hian engmah hre lo hian tawngkam na deuh deuh hian an dem vak vaka, ka khawngaih a nia” a ti. Sawrkar hi a pachhia a ni tih hi tun atang chuan mitin thinlungah hian chiang tlang tawh ila, tichuan, kan thil ngaituah dante, kan rilru put hmangte, kan tawngkam hman duh dan thlengin, a hmasawn zawng leh a tangrual zawngin kan danglam ngei ang.
Aizawl hi smart city ni tura min thlan zarah, electrict ban thar, hrui thar leh hmanraw thenkhat changkang deuh, Revamp Distribution System Scheme (RDSS) an buaipui mek hi an zawh hunah chuan, tun ai chuan tlema ziaawm deuh turah lo beisei phawt ila. Kum 2025 Fehruary thla hi zawh hun tura ruahman kha niin ka hriaa, an pawtsei em ka hre lo.
Amaherawhchu, kan sawi tak, transformer leh a behbawm leh thawktu tihphuisui kha chu a ngai lutuk tho tih kha chu hre reng ila. Tun atana kan lo ziaawm deuh theih nan, Sawrkar budget leh Deptt. pawisaa lei kher nghak lovin, Veng tinin kan rem hriat dan ang ang leh, min bialtu MLA te nen tang tlangin hma i lo la hrih phawt mai ang u. Sawrkar pawhin electrict bik atan eng eng emaw atanga chhiah/cess a lak a tha mai thei bawk.
Engpawh nise, kan vai hian rilru dik pu-in, hmasawn zawngin tang tlang ila, thil dangah leh electric lamah pawh hian ziaawm hun kan la nei ngei ang.