Cyclone Gabrielle-in chhiatna thlen nasa

New Zealand chuan Cyclone Gabriel-in a nuaichhiat te din that leh nan dollar billion tel hman a ngaih tur thu sawiin kum 12 kaltaa Christ church lirnghing avanga an sum sen tluk sen a ngai dawn an ti.
Gabrielle khan February thla laihawl khan North island-ah tuilian nasa tak thlenin kawngpui leh lei te a tichhe nasa hle a. Mi 11-in nunna chanin mi sang tel an chin hriatlohin an la awm mek a ni.
“Tun century-a New Zealand-in weather event a tawn rapthlak ber a ni a, billion dollar tel tehmeuh man hu a ni,” tiin Finance Minister Grant Robertson chuan a sawi.
Robertson chuan sorkar chuan dam khawchhuakte mamawh – eitur, chenna, electricity leh communication te chu ngaih pawimawh hmasak berah a nei phawt dawn a ti a.
“Zin kawng thui tak zawh tur kan nei a, he chhiatna hnuah hian indinthar leh kan ngai a, indinthar leh turin theihna leh sum kan nei a, kan indinthar leh ang,” tiin Robertson chuan a sawi bawk.
Loneitu ten an thlai leh ran rual te tuilian vangin an chan vek a, insurance-in a hum theih chin tur kan la hre mai thei lo tiin minister chuan a sawi bawk a.
Thawhtanni khan Prime Minister Chris Hipkins chuan kawngpui siam that nan NZ $250 million leh sumdawng te chhawmdawl nan NZ $50 million thehchhuah a nih thu a puang zui bawk.
New Zealand hian kum 2011-a Christchurch lirnghing avanga mi 185 in nunna chana mi sang tam tak chenna In nei lova a siam hnua indinthar leh nan NZ$ 13 billion a lo seng tawh a ni.
Robertson chuan Gabrielle chuan New Zealand infrastructure te that tawh lohzia leh climate change awm zelah an rintlak tawk lohzia a pholang tia sawiin tunah chuan kal dan thar an mamawha an kalpui a ngaih thu a sawi bawk a.
Tun atanga kum nga chhung pawhin dollar billion tel pawh seng ila, tihchhiat tin te kan la siamtha hman dawn chuang lo, tia sawi bawkin hun rei tak thleng sum sen dan tur ngaihtuah mai theih a ni rih lo, a ti bawk.
Hipkins chuan national emergency chu nisarih atana pawhsei a nih tur thu a sawi bawk a. Tun hi New Zealand history a chhanchhuahna hna thawh nana national emergency tum thum puanna chauh a la ni bawk.
Hipkins chuan mi 6,500 chuang te chu cyclone tleh hnuah biak pawh mai theiha an awm loh thu sawiin mahse thuneitute chuan mi 4,200 te chu an him ngei nia an hriat thu a sawi bawk a.
Mi 15,000 bawr vel North Island a chengte chuan power an la nei lo reng bawk a, Napier-a cheng 70% ten power an la nei thei lo bawk.