Cyclone Gezani-in Madagascar a nuaiah mi 35 thi tawh
Cyclone chak takin Madagascar a nuaiah thi chu mi 35 vel an ni tawh niin Indian Ocean-a thliarkar ram disaster authority chuan an sawi.
Cyclone Gezani hian Thawhlehni khan tuipui atangin khawmual lutin thliarkar lawngchawlhna lian ber, Toamasina a nuai a ni. Madagascar-a disaster management office chuan ‘buaina nasa tak’ an tawk tih sawiin in a chim a, ruangte pawh hmuh a ni tih a sawi.
Power line chhia avangin veng tam tak an thim a, thingkung tlu leh in chung hawk a tam hle bawk.
Environment Minister Max Fontaine Andonirina chuan mi 2,50,000 vel ‘tuartu leh baihvaiin an awm phah’ niin Ningani khan BBC Newsday a hrilh.
Hmabak lian tak an neih zingah ‘kawng a chhiat nasat avanga ei tur mamawh inpek kualna buai te, tuialhthei phurh kual te, damdawi inpek te chu a khirh zual dawn’ tih a sawi.
Gezani hi kumina Madagascar nuaitu cyclone pahnihna a ni a. A hma ni 10-ah khan tropical cyclone Fytia-in nuaiin mi 14 an thi a, mi 31,000 chuang baihvaiin an awm phah niin UN humanitarian office-in a sawi.
Thliarkara roreltute chuan ram dang puihna an dil mek.
“Kan chhiatna tawh hi a nasa lutuk a, Toamasina 75% dawn a chhia,” tiin sipai hotu, October thlaa thuneihna changtu, Colonel Michael Randrianirina-a chuan AFP news agency a hrilh.
“Tuna kan dinhmun hi chu Madagascar-in a hmachhawn theih phak piah lama ni,” a ti.
Cyclone-in khawmual a kai laia a chak zawng hi thlalem awm hnuah Toamasina nuaituah chuan a chak ber niin France-a Reunion thliarkar CMRS cyclone forecaster chuan AFP a hrilh.
National Office for Risk & Disaster Management chuan in tam tak chimah mi an thi a. Gezani hian darkar khata km 250-a chakin khawpui hi a nuai a ni.
“In ding 90% vel chung a len chhia a, thenkhat chu a vaia a lak pawh a awm,” tiin Action Against Hunger aid agency-a disaster management hotu ber, Rija Randrianarisoa chuan AFP a hrilh.
A ngai anga din leh turin ‘kum tam tak a ngai dawn’ tih Environment Minister Andonirina chuan BBC hnenah a sawi a, kum thum liam ta chhunga cyclone an tawrhte avangin Madagascar hi ‘a la tho chhuak hman lo bawk’ tih a sawi.
Indian Ocean-ah hian Madagascar vela cyclone thawh duh hun hi November leh April inkar niin kum tin eng emaw zat an tuar thin tih AFP chuan a tar lang.
Disaster management office chuan hliam tuar tam tak leh mi 4,00,000 vel chenna, Toamasina chhehvel district-a mi za tel hmun himah an sawn chhuak.
Cyclone a thawh hma hian thuneitute chuan sikul chawlh puangin emergency shelter-a awm turin mite an ngen bawk a. Nilaini zan khan cyclone hi tropical storm-ah a chang zui tawh thung.
Gezani hian Mozambican Channel atangin Madagascar a chhuahsan tawh a, Mozambique-a National Meteorological Institute (INAM) chuan an ram a luh an ring lo va, ram lailiah erawh ruah tam tak leh thli a thawt tho tur thu an sawi.
Mozambique hian thla tam tak khaw awm dan uchuak tak turin mi sang tel an in leh lo chhuahsan ngaiin an awm mek a. Tanpuitu pawlte chuan thil awm dan a duhawm lo lehzual dawn niin an sawi.