Cyclone laka inveng lawk turin chah

Regional Meteorological Center India Meteorological Department chuan hriattirna a tihchhuah angin Bay of Bengal tuipui atanga cyclone insiam chuan zawimuangin hmarchhak (Northeastwards) a pan hlek hlek a. Cyclone insiam avang hian Mizoramah October 24-26 chhung hian ruahsur tura ngaih a ni.
Cyclone leh ruahtui avanga chhiatna thleng theite lakah fimkhur turin leh inkaihhruaina zawm turin hriattirna a chhuah a. Mahni in leh lote ruah a dawl theih nan a tul anga thawmthat ngai lai thawmtha a, tuidawn mumal taka siam a, him taka ruahtui lakkhawm emaw luanchhuahna siam turin mipui chah an ni.
Tui paihna leh tuiluankawrte mumal taka siam a, ruahsur avanga leimin thei laite hrechianga fimkhur a, tui hmun, lui leh ramhnuaiah kal loh a him rih tih an sawi.
Mahni in leh a velah leimin hlauhawm a awm a nih chuan a min tur venga hma la tur te, ruah vanga eng (power supply) neih loh theih a nih avangin electric hmang thil charge lawk theih apiang charge lawk a that thu te, rikrum thila mamawh tur – torch light, emergency light, first aid kit, tui thianghlim leh eitur inrinlawk a tha thu te an sawi bawk.
Tek tlak laiin hmun him leh hula awm hram tur te, lirthei leh chetvel chungchangah traffic police/thuneitute thu zawm hram hram tur leh hmun hlauhawma awm loh turin an chah a ni.