Cyclone siperin chhiatna lian thlen lo

Cyclone siperin chhiatna lian thlen lo
Mizoramin ‘Cyclone Mocha’ siper a tawng ve a; Mamit, Lunglei, Lawngtlai leh Siaha district chu a tuar na zual deuh niin, chhiatna liantham erawh a thlen lo nia hriat a ni.
Thlipui siper vang hian Inrinni zan atang khan Mizoram hmun engemawzatah chuan power supply a tibuai nghal a. Hei hi thlipuiin a tihchhiat lam aiin, lo invenlawkna avanga power tihtawp lailawk te a ni hlawm tih thu dawn a ni. Power hi Pathianni pawh khan hmun engemawzatah chuan an nei mumal lo a ni.
The Aizawl Post thudawn danin, Siaha ah chuan thli thawk avang hian Pathianni chawhma inkhawm pawh a khaihlak a, chawhnu lamah erawh inkhawm programme siam an awm nual tawh a, zan lam chu dan pangngai angin biak in programme hman theih a ni. Thli hian thil tihchhiat liantham a neih sawi tur a awm meuh lo nia sawi a ni.
Lawngtlai district ah pawh thli hi a na a, chhiatna liamtham erawh a thleng bik lo a ni. Inchung lak a nei nual a, hall, school leh biak in te bakah mimal in te a tel a ni.
Lungleiah pawh Pathianni kohhran programme thulh a awm nual bakah programme kaltlangpuinaah pawh inkhawm an tam lo nia thu dawn a n i a. An district ah hian Thaizawl khua chu a tuar na pawl tak niin, biak in chung a lak bakah Bangladesh atanga raltlante awmna chu thli hian a tichhe nasa tih thu dawn a ni.
Mamit district-ah mimal in tihchhiat a nei a, khaw pali vel a tuar na zual an awm a. Chhiatna lian tak erawh a thleng bik lo nia sawi a ni.
Cyclone Mocha hi Mizoramah thawk na ve thei nia sawi a nih avangin sawrkar a inralring hle a, Inrinni atang khan a kaihhnawih department hrang hrang chu nilengin an chanpual hna a tul anga ti nghal thei turin an duty a ni.