CYMA leh Kohhran \halai pawl ruihhlo dona

Tun hnaia Central YMA hruaitute leh Mizorama Kohhran hrang hranga thalai pawl hruaitute chuan ruihhlo leh a kaihhnawih chungchanga thawhho dan tur an rel a, coordination committee din ni se an ti a. He committee hian Harm Reduction leh Supply Reduction lamah theihtawp chhuahin hma an la thin dawn a ni.
Ruihhlo avanga kan state-in harsatna kan tawh dan hi a namai tawh lo hle a. Sawrkar leh pawl hrang hrang tanghovin nasa taka hma lak a ni thin a, mahse kiam lam aiin zual lam hi a pan deuh deuh niin a lang a. Heti taka ruihhlo a hluar theih chhan hi eng nge tih chhui chiang chunga chumi mila hmalak chu a pawimawh dawn hle tih a lang a ni.
Tuna Central YMA leh kohhran hrang hranga thalai pawl ten ruihhlo leh a kaihhnawih do tura thawhho dan tur an rel hi a lawmawm hle mai a. Hmalakna tur lian tak tak an duan hi a that em em rualin, ‘demand reduction’ pawh hma tel thei se chuan duhthusam a nih a rinawm.
A nihna takah chuan, supply reduction lamah hian, sawrkar thuneihna nena kal kawpna tur chi a awm thin avangin, civil mite inrawlh thuk lutuk hi a tha ber angem tih hi zawhna awm thei a ni awm e.
Tun dinhmunah hian ruihhlo hian bu a khuar thuk sawt hle a. Kum tling lo zingah pawh bu a khuar thuk sawt hle a, chumi awmzia chu Demand a sang sawtin a zau sawt hle tihna a ni. Demand tih tlemna tur lama tanlak hi tihmakmawh a nih ve tho avangin, hei tak hi kohhran thalaite hmalakna tur nen pawh a inmawiin nasa taka hma lak theih a nih ngat chuan, awmzia a nei thui hle dawn tih a lang a ni.
Demand Reduction lama hmalakna turah hian zirna in a pawimawh em em dawn a, zirna inte nen pawha thawhhona thuthlung siam a pawimawh ang a. Chutih rualin, kohhran thalaiten biak in lamah, sande skul lamah tan an lak a remchang nghal bawk ang. Thu leh hla, a literature zawng pawhin hma a lak theih dawn tih a lang bawk awm e. Demand tihtlemna tura tanlak hi ruihhlo dona atana hmalakna sawt tak a nih a rinawm a ni.