Damdawi in atangin Eubank chhuak fel

Damdawi in atangin Eubank chhuak fel
Karliamta Inrinni khan London khuaa Tottenham Hotspur Stadium-ah 12-round middleweight fight hautak zet hmachhawnin Chris Eubank Jr chuan unanimous decision-in a tumpui Conor Benn a hneh a, inhnek zawhah boxer-te fimkhurpuina dan tlawhchhanin damdawi inah dahluh a ni a, Thawhtanni khan damdawi in a chhuahsan leh nghal.
Tarlan tak angin, promoter Ben Shalom chuan Eubank damdawi ina admit a nih chhan hi ngaihtuahawma a awm vang ni loin inhnek hautak bika boxer-te hriselna venpuina peng pkhat (standard procedure) mai a nih thu leh ngaihthat lohna tur dang a awm loh thu a sawi.
Kum 35-a upa Eubank pawh hian Thawhtanni khan social media lamah post siam zui nghalin, “He inhnek intham vel hian kum thum dawn a awh a, a tawpa tawpah chuan kan tlingtla ta.
“Inrinnia kan inhnek min tawiawmtu leh thawm ring tak min chhuahsaktu fans khati zat tel lo kha chuan he inhnek hi hlawhtling zo lo tur a ni a, ka hringnuna hun hlu bik min thlensaktute zawng zawng chungah ka lawm e,” tiin.
Fighter pahnih innuai na zet endiktu judge pathumte khan 116-112 vekin Eubank an chaktir a; rin loh takin a pa Chris Eubank Sr pawh a fapa tawiawmin stadium chhungah hmuh tur a awm nghe nghe.
Eubank junior leh senior hi kum tam tak khawsa dun tawh lo nia sawi an ni a, Eubank Sr hian a fapate inhnek tur hi a lo sawisel tawh bawk avangin Inrinni inhnek pawh kha a hmuna a tawiawm an ring lo a, mahse, hmuh tur a awm ve ta a ni.
Kha inhnekin ngaihven a hlawhna chu Eubank Jr hringtu Eubank Sr leh Conor Benn-a pa Nigel Benn-te kha vawihnih an lo inhmachhawn ve tawh a, a hmasa zawka an inhnehtawk hnu kum 1990-a an inhnek nawn lehah chuan Eubank Sr a chak a, tunah a fapain hnehna a chang zui leh ta a ni.