Damdawi in bawlhhlawh sawngawlna tur siam dawn

Solid Waste Management Centre Tuirialah damdawi in thli leh bawlhhlawh sawngbawlna leh tih ralna tur bik siam a ni dawn a. Zirtawpni khan UD&PA changtu deputy chief minister Tanwluia’n a lungphum a phum.
Aizawl Smart City Limited hnuaiah hmasawnna ruhrel din leh leh buatsaih mek zel a ni a, lungphum a phum tak pawh chu Aizawl Smart City hnuaia project pawimawh tak pakhat a ni tih deputy chief minister hian a sawi a. Aizawl khawpui chhunga bawlhhlawh sawngbawlna hmun tha tak siam a nih hnu ah, damdawi in atanga bawlhhlawh sawngbawlna tur Bio-Medical Waste Treatment Facility lungphum phum a ni chu lawmawm a tih thu a sawi.
Damdawi in atanga thli leh bawlhhlawh chi hrang hrang hian mihring hriselna nasa takin a nghawng thin tih sawiin, project chu zawh thuai a nih theih na’n contractor-te chu chak zawk leh tha taka hna thawk turin a chah. Bio-Medical Waste Treatment Facility sakna tur hmun petu Tuirial Airfield Veng Village Council, khawtlang hruaitu leh veng mipui chungah lawmthu a sawi a ni.
Khualzinmi ten Aizawl leh Mizoram khuate fai an ti hle tih Tawnluia hian sawiin, “Hei hi sawrkar bakah khawtlang mipui tan lak nasat vang a ni a. A bikin Aizawl khawpui vawnfai leh enkawl hna thawktu Aizawl Municipal Corporaton hmalakna a fakawm a. Khawpui fai leh thianghlim chuan khualzin tam zawk a hip thei dawn a, state tan sum lakluhna tha tak a ni thei dawn a ni,” a ti.
Aizawl mayor Lalrinenga Sailo chuan Common Bio-Medical Waste Treatment Facility chhawr tangkai ber tur chu AMC a ni, tiin, damdawi in bawlhlawh chu paihna mumal awm lo a nih avangin AMC-in harsatna a tawk thin tih a sawi a ni.
Aizawl Smart City Ltd chief executive officer CC Lalchhuangkima sawi danin, Common Bio-Medical Waste Treatment Facility sakna atan hian cheng vaibelchhe 7.6 hmuh a ni a, contractor atan M/s BL Engineering Gujarat leh GI Infotech Aizawl thlan niin, 2020 September 12 khan inremna thuthlung ziah a ni . Tunah hian phyical progress zaa 15 neih tawh niin, project hi kumin June 9-a zawh tura tih a ni.
Bio-Medical Waste Treatment Facility atan hian khawl pathum – incinerator (bawlhhlawh halna), shredder (bawlhhlawh thler sawmna) leh autoclave (medical waste tihthianghlimna) a awm dawn bakah Effluent Treatment Plant (tui tihthianghlimna) a awm dawn a ni.