Damdawi in tha leh fai thlang

Damdawi in tha leh fai thlang
National Health Mission (NHM) programme buatsaih 2023-2024 leh 2024- 2025 sawrkar kum chhunga sawrkar damdawi in tha leh felfai inelna – Kayakalp a tithate hnenah Zirtawpni khan lawmman sem a ni a. Lunglei Civil Hospital chuan 2024- 2025 Eco-Friendly Award a dawng.
Lawmman sem hmanpuitu Health minister Lalrinpui chuan Kayakalp tum ber chu faina a ni, tiin, Mizorama damdawi in hrang hrang, Sub-Centre atanga Primary Health Centre, District Hospital thlengin a tlawh hnem tawh a, hengah hian Kayakalp hi a hlawhtling hle nia a hriat thu a sawi.
NQAS leh Kayakalp checklist tha taka an hlen chhuahin an service pawh quality zawk leh tha sawt tura beisei an ni tih sawiin, “Heng zawng zawng kan tih chhan ber mipui leh damlo kan enkawlna kawngah hmasawnna a awm ve si loh chuan awmzia a nei dawn lo,” a ti. Kayakalp leh NQAS laimu zing ami chu hawihhawmna a nih vangin damlo damdawi in pantute reng reng hawihhawm leh rang taka lo buaipui zung zung tur leh enkawlna dik an mamawh ngei an dawn theihnan hma la thin turin a chah.
‘Kayakalp’ hi faina kawnga sawrkar damdawi in inelna niin, endikna tur duansa (checklist) hmangin chhawng thuma endik an ni a. Damdawi in leh a chhehvel felfai taka an enkawl danah, damdawi in atanga bawlhhlawh chhuak thliarhrana natna hrik inkaidarh lohna tura sawngbawl hnua a paihna hmun dik taka paih a nih dan, thawktuten an hna bil theuh an thiam dan, damlote ngaihdan lakna (patient satisfaction survey), khawtlang nen faina kawnga an thawhhona leh eco-friendly lama an hmalakna endik a ni.
8 District Hospital category-ah 1-na in Rs. 550000; 2-na Rs. 450000; 3-na Rs. 350000 leh commendation award Rs. 150000 a ni a. 2023- 2024 ah 1-na Champhai DH, 2024- 2025 ah 1-na Saitual DH
8 District Hospital Eco-Friendly Award ah 1-na in Rs. 450000, 2-na Rs. 300000 niin, 2023-24 ah 1-na Siaha DH, 2024-25 ah 1-na Civil Hospital Lunglei.
8 Khum 150 aia tam awmna chin District Hospital Special Award siam a ni a, hetiang zinga tha taka Kayakalp kalpui pathum – Civil Hospital Aizawl, Civil Hospital Lunglei leh SRH Falkawn hnenah Rs. 100000 theuh hlan an ni. Best Teamwork (DH) lawmman Rs. 100000 chu Khawzawl DH-in a dawng.
8 Sub-District Hospital leh Community Health Centre category-ah 1-na Rs. 400000, 2-na Rs. 300000, 3-na Rs. 200000 leh commendation award Rs. 80000 a ni a. 2023-24 ah 1-na Thenzawl CHC, 2024-25 ah pawh 1-na Thenzawl CHC a ni.
8 SDH/CHC Eco-Friendly Award ag 1-na in Rs. 300000 leh 2-na Rs. 200000 a ni a. 2023-24 ah 1-na Lengpui CHC, 2024-25 ah pawh 1-na Lengpui CHC a ni.
8 Urban Primary Health Centre ah 1-na in Rs. 135000, 2-na Rs. 82500, 3-na Rs. 50000 leh commendation award Rs. 15000 a ni. 2023-24 ah 1-na Chawlhhmun UPHC, 2024-25 a 1-na Sihphir UPHC.
8 Primary Health Centre chu health department-in district a then dan angin district tinah a hranpa theuha lawmman siam a ni a. 1-na in Rs. 150000, 2-na Rs. 100000, 3-na Rs. 80000, commendation award Rs. 40000 theuh a ni.
8 Health & Wellness Centre / Sub-Centre (HWC-SC) ah 1-na Rs. 75000, 2-na Rs. 50000, niin commendation award-ah Rs. 25000 theuh an dawng.