Damdawi ina buaina siamte jail-ah dah rih

Damdawi ina buaina
siamte jail-ah dah rih
Tunhnaia damdawi in chhunga mi rikrap leh tharum thawh zawnga che mi panga chu police-in an man hnu ah court hmaah inlanin, jail-a dah rih an ni.
January 31 zana Adventist Hospital Seventhday Tlang Chawnpuia damlo pakhat leh amah awmpuitu luhchilha tharum thawh zawnga vau bakah kut thlak chungchangah he damdawi in hotuten Vaivakawn Police Station-a thubuai an thehluh bawhzuiin police-te hian he thila inhnamhnawih nia hriat mi panga – Roderick Thangdingliana Renthlei (32) Zonuam Veng; Lalduhawma Khawlhring (38) Kanan Veng; Lalsangzuala Ralte (33) Luangmual leh Abenego Lalrinawma (31) Chhinga Veng leh Lalruatdika (35), Ramhlun South chu February 2 khan manin thubuai an siamsak a. February 3 – Thawhtanni khan court-ah an inlan a ni. Court thupek angin Central Jail-a dahluh rih an ni.
Hetihlai hian ukil-te intelkhawmna pawl – Mizoram Bar Association (MBA) Gen. Hqrs chuan social media-a Roderick Thangdingliana Renthlei thu post leh insawi dan avangin thuchhuah a siam a. Ni 31.1.2025 a Adventist Hospital Seventh Day Tlang Aizawla pawikhawihna kaihhnawiha mawi lo taka chet thawhtute zinga mi pakhat, Roderick Thangdingliana Renthlei (Roderick Renthlei) chu ama inchhal anga advocate a nih an hriatpui loa, an member a ni lo tih mipui an hriattir tih a sawi.
‘Hetianga advocate hming chhala midangte diriam leh chungtlak zawnga thil tih hi Mizoram Bar Association chuan pawi a tiin, mahni nih lohna anga inchhal hi tun hnuah thleng tawh lo se kan ti a ni,’ a ti.