Damdawi khuahkhirh…
Nerve tha lote nachhawkna atana hman thin damdawi chikhat chu tun lai hian ruih nana hmang sual an tam niin Saitual Excise OC chuan tun hnai khan a sawi a. He damdawi hi tlawm tea dawra lei theih a nih avangin khuahkhirh a tul hle, a ti.
Senior medical officer pakhatin a sawi dan chuan, he damdawi ruih nana hmang thin te chuan damdawi dawrah doctor lehkha (prescription) tel loin awlsam takin an lei thin, a ti a. Schedule-I hnuaia damdawi khuahkhirh zinga tel tura hma lak mek niin, India Drugs Advisory Board thuchhuah nghah mek a ni a. Schedule-I hnuaia damdawite hi damdawi dawr pangngaiin an zuar thei lo a, general license neite chauhin an zawrh theih bakah doctor lehkha (prescription) nen chauh lei theih a ni, a ti bawk.
Damdawi dawr pangngaiin an zawrh theih loh leh, general license neite chauhvin an zawrh theih, doctor prescription tel lova lei theih loh ni bawk si hi, ‘damdawi dawrah doctor lehkha (prescription) tel loin awlsam takin an lei thin’ tih a ni bawk si a. Damdawi dawrte mawhphurhna a sang ta hle!
Kum 2023 kum tawp lam khan district DC-te chuan, medical store zinga - Scheduled H, H1 & X zuarte chu an dawrah CCTV Camera dah vek turin thupek an lo chhuah tawh hlawm a. He thupek bawhchhiate chu dan angin hrem an ni ang tih a ni bawk. Kha pawh kha khauh taka kenkawh zui a ni ta zel em?
Damdawi hman sual a hluar chhan pakhat hi chu, damdawi dawr thenkhatin daktawr lehkha tel lova hralh chhuah loh tur an hralh chhuah thin vang a ni a. Ruihhlo hlauhawm tak tak (Heroin No 4, etc) zuarte nen an danglam chuang lo tihna a ni ber awm e. A chhan pawh, doctor lehkha tel lova lei tumte chu an hmel atang pawhin rinhlelh theih tak tur an nih a rinawm a, chutiang mi hnena daktawr lehkha tel lova damdawi hmansual theih chi an hralh chuan, a leituten an hmang sual ang tih ring chunga hralh an nih dawn miau avangin, an mawhphurhna a sang hle a ni.
Damdawi khuahkhirh tur a awm rualin, damdawi zuartute pawh khuahkhirh an tul tihna a ni nghal bawk a. Dan pawh hi khauh zawka kenkawh dawn chuan taimak te hi a ngai a, thil tha kan duh chuan taimak, hahpui leh tawrh ve deuh te hi a ngai thin a ni.