Damdawi lama fimkhurna…

Mizoram pawn lam atanga doctor/damdawi lama thiamna nei thenkhatte’n Mizoram State Medical Council-a inziak lut hmasa lovin Mizoram chhungah damlo an en thin tih hriat a ni a. Hemi chungchangah hian Mizoram State Medical Council chuan hriattirna a chhuah angin Khawzawl bawrhsap chuan nimin khan mipui hriattirna a tichhuak ve nghal a. Dan bawhchhia chu Mizoram Medical Council Act, 2010 leh National Medical Council Commission Act, 2019 Section 34 hnuaiah hrem theih an ni.
Thuchhuahin a tarlan dan chuan, Mizoram Medical Council-a inziah luh loh chuan Mizoram chhungah doctor-in damlo a en thei lo a; Private Hospital, Nursing Home, Charitable Institution, NGO leh Non-Governmental Health Facility zawng zawngte’n State Medical Council-a inziak lut lo doctor-te chhawr/hna pek theih a ni lo a; mi tu pawhin doctor a rawn dawn a nih chuan, Mizoram Medical Council-ah a inziak lut em tih a hre chiang phawt tur a ni; Medical Camp emaw, damlote tana tha tura hmalakna buatsaih a nih in, Mizoram Medical Council chuan hun rei lo te atan phalna a pe thin a; Mizoram Medical Council phalna la lova hma lak a nih hriat chuan hremna pek theih a ni, tih a ni.
He thuchhuahah hian mipui lam tihtur pakhat a awm ve a, chu chu — “mi tu pawhin doctor a rawn dawn a nih chuan, Mizoram Medical Council-ah a inziak lut em tih a hre chiang phawt tur a ni” tih hi. A dawtah chuan, private hospital leh hriselna kaihhnawih Home/NGO te hriattur a awm leh a, chu chu “state medical council-a inziak lut lo doctor/medical practitioner rawih loh tur” tih a ni bawk.
Medical Council lam hian tihtur pakhat an la nei niin a lang a, chu chu — “doctor ten an clinic/dawhkanah, an hming leh nihna bakah Medical Council-a an inziahluhna registration number etc. chiang tak leh langsar takin an tarlang tur a ni” tih hi.
Hetiang nihna tarlan tur nei lote chu, “Ka pu, Medical Council-ah i inziak lut em?” tia damloten an zawh kher a ngai tawh dawn lo a, an kalkan ve thei tawh mai dawn a ni.
Hei bakah hian, damdawi lama fimkhurna tur hrang hrang pawh a la awm nual awm e. Dawr pangngai thenkhat, tlema veng keltil deuha awmte hian, ‘miin an rawn lam ve thin’ tih vang ngawtin nachhawkna leh damlohna tlanglawn deuha hman tur chi damdawi thenkhat zuar tel ve an awm thin a. Hei hi mipui tan a him lo a, damdawi dah danin a zir loh avang te, expire tawhte etc. a lo ni thei a, hengte pawh hi thuneitute hian a tihreh dan tur an ngaihtuah tel a pawimawh hle a ni.