Damdawi vangin Pogba an ‘suspend’

On Sep 13, 2023 9 0

Damdawi vangin Pogba an ‘suspend’
Juventus midfielder Paul Pogba chu infiammite tana hman phal loh damdawi a khawih em tih enfiahna (anti-doping rules) a bawhchhiat avangin inkhel thei lo tura ‘suspend’ phawt a ni a, a chet dan an chhui ang a, thiam a chang zo lo a nih chuan kum hnih atanga kum li thleng football khel thei lo tura hnawhchhuah a ni ang!
August ni 20-a Udinese khelmuala sithum faia Juve chak tum khan Pogba hi substitute bench lamah thu tluanchhuak mah se inkhelh bana dan anga endikna (post-match drug testing)-ah Italy rama damdawi ti leh ti lo enfiahtu national anti-doping tribunal (Nado) chuan Pogba fihlim loh thu an puang a, mipatna tichaktu damdawi (testosterone) an hmuh thu tarlan a ni a, he damdawi (steroid hormone) hi infiammite’n chauh harna leh phurna thlentu atan an hmang ru thin.
Kum 30 mi France international Pogba chungchangah Juventus pawhin thuchhuah siam tawhin, National Anti-Doping Tribunal atanga an player Paul Labile Pogba laka hremna hmasa lekkawh a nih thu an hriat tawh thu leh case kal zel an thlir zel tur thu an tarlang.
Nado thuchhuah chuan Pogba dan bawhchhiat-na damdawi hi ‘non-endoge-nous testosterone metabolites’ niin an sawi a, an player ‘suspend’ chuan hriattirna a dawn atanga ni thum chhungin test result a khinglet thei ang tih an puang tel.
Juventus chuan nikum July thla khan an player hlui Pogba hi kum li chhung atan an senglut a, Manchester United-a con-tract hmang zo a nih avangin man nei loin an lalut a; Turin-a a kirleh hnuah hliam avangin a talbuai chhunzawm a, nikum Qatar ram World Cup-ah pawh ram tan a inlan thei lo.
Pogba hian season kal laiah Juventus tan Bologna leh Empoli hmachhawn ve tawh mah se substitute bench atang ve vea lut a ni a, minute 51 chiah khelmualah Serie A match khelin hun a la hmang.
Season liamta pawh khan league match ruk khelin minute 108 chhung chiah a khel a; Europa League lamah pawh tawite tein match thum a khel a, assist vawikhat neiin, Coppa Italia lamah belhkhawmin minute 162 hun a hmang a, goal a khung zo lo bawk.