Dampa bial by election atana ZPM candidate Vanlalsailova

Dampa bial by election atana
ZPM candidate Vanlalsailova
Dampa bial MLA by election neih turah ZPM party candidate atan 2023 MLA inthlanpuia he biala ZPM ticket-a lo ding tawh Vanlalsailova chu ding tura ruat a ni.
Thawhtannia ZPM office-a inkhawmah party president Lalliansawta chuan an candidate atan an ruat hi a puang a. Party Nomination Committee-in a ruatna chu lawm takin a pawm tih Vanlalsailova hian a sawi ve bawk.
ZPM president chuan, Dampa bial MLA Pu Lalrintluanga Sailo-in hun lo taka chatuan ram a pansan avangin a kalsan hmunruak hnawhkhata by-election neih a lo ngai ta chu pawi an ti a. Chutih laiin inthlang ram kan nih anga a hmunruak hnawhkhat tura inthlan a ngaih avangin, party Nomination Committee chuan lungrual takin Pu Vanlalsailova an thlang a. Duhsakna an hlan a, party mipui pawh lungrual taka thawk tlang turin an inngen tih a sawi a ni.
ZPM official candidate-a puan Vanlalsailova chuan bialtu MLA Pu Lalrintluanga Sailo-in a kalsan chu a ui takzet a, a kalsan tak a chhungte hnenah tawrhpuina a hlan nawn tih a sawi.
2023 inthlanpuiah a tling zo loa, theihtawpa vil zui duh mah se, party headquarters thuchhuak awihin bial vil a rem loa, chuti chung chuan 2028 inthlanpui atan a inbuatsaih sauh sauh reng tho tih a sawi a ni.
“Beisei leh rin aia hmaa inthlan hmachhawn a ngai hi a pawi a. Pu Rintluanga’n hmangaih taka a lo enkawl tawh a bial hi kei pawhin duat leh tha taka enkawl zui thei turin Pathianin kawng min hawnsakah ka ngai a. Ruling bial lo ni tawh thin kha, kum khat leh thla 8 chhung lek opposition bial kan ni chungin, hrehawm kan tih zia kha hrereng ila, ruling bial nih zui theihna hun remchang inher chhuak leh hi, lungrual taka bial hmangaihna nen min lo thlawp turin Dampa bial mipui ka sawm a ni,” a ti.
Politics leh sawrkarah chuan ruling bial nih a hlu a, opposition MLA-te tih theih loh chin tam tak a awm avangin bialin hmasawnna tluantling neih theihnan sawrkar lai an tlin ngei a ngai tih Vanlalsailova hian a sawi a ni.