DAMPA BIAL BY-ELECTION THLIRLETNA

James Ramdinmawia
Kan hriat theuh angin Dampa Assembly Constituency By-Election 2025-ah Ruling Party, ZPM Candidate Vanlalsailova chu tling zo lovin MNF Candidate Dr. R. Lalthangliana a tling ta a nih kha.
Mizoram Political History kan en chuan By-Election-ah Ruling Candidate tling lova Opposition Candidate an tlin nalh hi a thleng khat hle a, hetiang hi vawithum chauh a la thleng a ni. Tun tuma Ruling Party Candidate a tling zo ta lo hian chhan hrang hrang a nei a, a chhan langsar ni-a langte chu:
Ruling Party-in Candidate an set fuh lo :
Ruling Party Candidate hi Mizoram puma ZPM thlipui a tleh hun lai pawha tling zo tawh lo kha a ni a. Dampa Bial mi ni kher lo, Mizoram mipui nawlpui ngaihdan ka thlirin MLA / Minister ni turin amah hi mipuiin an it lo a ni. Mi thenkhat chu TV Interview an hmachhawn te, vantlang hmaa an thusawi vawikhat ringawt atang te pawhin an invawrh kang dawrh thin a ni a. ZPM Party Candidate erawh a TV Interview hmachhawn leh Party Office-a a thusawiin amah a beng hniam ta daih thung. Politician phanchang, mipui pawhin an ngaizawn rawn tur emaw, mithiam leh mi intellectual deuh Candidate-ah han dah zawk se chuan ZPM Party hi Ruling Power nen an tling ngei ang tih hi mipui nawlpui ngaihdan leh Dampa Bial mipui thenkhat ngaihdan a ni.
ZPM Party danglam bikna-ah inhnialna a tam :
Assembly General Election 2023-ah ZPM Party inzawrhna, an danglam bik tur thu te, “Kan ti ang,” an tih te, “Kan ti ve lo ang,” an tihte kha kan la hre vek awm e. An han sorkar a, “Kan ti ang,” an tih tam tak an tihlawhtling chho a, la tih hman loh, hmabak pawh an la ngah viau. Thlaithar lei te, Sorkar hnathawkte hun vawng dik tura khawng taka hma an la te, aikal an titawp te, Sorkar hnalak hrang hrang fair taka an kalpui te, eirukna leh thamna lak kawnga an Minister leh MLA hminghliau an la awm lo te, Department hrang hranga hmasawnna lo awm ta te, kan sawi vek seng lo ang, hna chu an thawk tha a ni. Chutih rualin “Kan ti ve lo ang,” an tih tam tak, an danglam bikna tur anga an sawi kha an ti ve ta teuh lawi a. Restricted Tender te, SASCI Project hrang hranga hna zawh hmaa Utilisation Certificate thehluh te, Party Worker Contract hna pek te, CM Car manto lei thar te, eirukna an hua emaw kan tih laia Court-in eiruk Case-a a convict tawh an Party-a lawmluta LADC CEM an nihtir te, ZPM Kamrul-a an tih hial khawpa an MLA Candidate tling zo lo Contract hna lian hmu thei bik riau an awm te, Austerity Measure kalpui an tum emaw tih laia Adviser to CM an nei leh teuh te, sawi tur a tam mai. Hei hian anmahni thlang tlingtu mipui beng a tithlep a. Chu chuan Dampa Bial thlengin a nghawng a ni.
Dampa Bial By-Election-a Opposition Party Candidate a tling ta nawlh hian ngaihtuahna a tithui hle a. Dampa Bial mai ni lo, Mizoram mipui nawlpui hi he Inthlan Result-ah hian an lawm niin ka hria. Dr. Thangtea leh MNF Party kan duh thar ta thut lam ni lovin Ruling Party Candidate set fuh loh vang leh over-all-a an Sorkar Performance kan duhkhawp loh vang niin a lang. ZPM an inenfiah a ngai e.
Ruling Party Worker-te :
General Election 2023-a ZPM tlin chhan kha Party mi leh sa an ngah vang a ni lo. MNF leh Congress nin tawh vang leh anmahni ZPM-in Angel thianghlim ang maia an inzawrh thiam avangin mipui nawlpuiin an vote huk a ni. Neutral Vote avanga tling an nih mek laia an Party Worker-te kei tak emaw an inti chho tan hian anmahni support-tu Neutral mipui mit a tikham. Mipui Sorkar an tiam a, chutih laia an Party Block leh Unit hruaitute an intihthu viau a, an thu leh hla Sorkar pawhin an dah lal viau a nih chuan mipui hian kan tinsan leh mai ang tih a hlauhawm. Dampa Bial By-Election Result hian thui tak a hril awm e.
CM tawng tam lutuk :
Kan Chief Minister Pu Lalduhoma hi duh aiin a tawng tam hret. Pu Zoramthanga CM laiin fiamthu thawh nan kan hmang luih luih a, Pu Lal Thanhawla CM laiin nasa takin kan sawisel bawk a. Khatiang dinhmunah khan a indah ve ang tih a hlauhawm. Sorkar-ah Commissioner / Seretary-te sawi awm tê tê, Politics lamah Party Spokeperson leh Thalai lam sawi awm tê tê te ama’n sawi vek a tum a. State pakhat CM meuh hi chu tawng tam lovin, ama sawi awm chin leh sawi awm loh chin thliar hrang se, a thusawi leh a tawngkam beih let tur pawh a tlem deuh ang. Tin, tunhmaa a thusawi leh tunhnua a thusawi inkalh tlat ang chi hmuh tur leh hriat tur a awm fo mai hi amah ngaisangtute rilru tihnualtu a ni. Dampa Bial By-Election Campaign-a a thusawi, “Vanlalsailova thlang duh lotu chuan Lalduhoma in duh lo tihna a ni,” a tih te kha amah vaw lettu a ni ta tlat mai a, ama thusawi ngei hmangin Lalduhoma duh lotu an tam ta hle tih amah ngeiin a nemnghet a ni.
Tin, Mizoram Chief Minister atana Kohhran Upa kan neih hmasak ber a ni a. Kohhran huang chhunga tawngkam kan hman duh loh, Politics huang chhunga kan hmang duh fo mai hi a tha lo hle a, CM hmasate aiin amahah hian mipui an duhtui tih a hriat fo a tha awm e.
Ruling Party Spokesperson nei fuh lo :
Political Party hrang hrangte hian Spokesperson an nei thin a. Spokesperson an neih that chuan an invawrh dawrh a, an neih that loh chuan an tlahniam rawih thei. ZPM hian Spokesperson an nei fuh tawk lo ka ti a. Press Meet a neih tawh chinah leh Press Statement a neih tawh chinah hian ZPM Party-in an kàn phah dawrhna aiin mipui beng tithlep chi hmuh tur a tam zawk tlat. Hei hian thui takin Dampa Bial By-Election a nghawng a, LADC inthlan leh AMC Inthlan an la hmachhawn turah te nghawng a nei dawn bawk a, Spokesperson an thlak vat loh chuan an che chhe tluang zel ang tih a hlauhawm.
Serchhip Bial By-Election-ah khan rorel lai MNF Party chuan an rawng huai serin Ruling thiltihtheihna nen vau titih, thlem titihin nasa takin an campaign a nih kha. Chuti chunga Ruling Party vauna engahmah ngai lova Serchhip Bial mipuiin Pu Lalduhoma (tuna kan CM ni ta) an thlang nawn leh ngat kha a Bial mipuite an fakawm thu ka lo ziak ve tawh nghe nghe. Tuna Dampa Bial By-Election-ah pawh hian Ruling Party Candidate leh Minister thenkhat tawngkam atangin vauna ang zawnga ngaih theih hriat tur a awm nual a. Chuti chunga Opposition Party Candidate an thlang tling nalh hi Dampa Bial mipui an entawntlak ka ti hle. Mizoram Politics-ah hian invauna te, insawi thaihna te, dawt hmanga inthlemna te hian hmun a luah rei tawh hle mai a. ZPM pawh an han sorkar chiah a, By-Election an hmachhawn danah an danglam bikna hmuh tur awm lovin ramhlui zia tho-in an campaign ve leh a. Hetiang hi bo tawh se ka ti khawp mai.
ZPM sorkar tirha mipui kan phur ang em ema Sorkar thara beiseina neia Mizoram mipui kan phur kha ka hriat ve phakah chuan a la awm lovin ka hria. CM-in eng thil thar nge a sawi leh dawn, eng hmalakna thar nge, eng lam hawi Change nge a rawn sawi chhuah leh ang tiin Chanchinbu leh TV Chanchinthar te kha kan nghakhlel riau zel a nih kha. Mahse hei kum hnih dawn an sorkar ta a, mipui beisei an pha lo hle. Quo Vadis Movie tawp lama Rome Sipai Officer pakhatin, “Mipui hi an phur tawh vak pawhin ka hre lo,” a tih ang deuh khan ZPM Sorkar-ah hian mipui hi kan phur vak tawh lo niin a lang. Social media leh tlangkam titina reng rengah 2023 Inthlanpuia ZPM support em emtu Neutral tam tak kha chuan an sawisel leh tan tawh a ni. Kum thum chhung insiamthatna hun an la nei a, an insiamtha duh lo a nih chuan 2028 Inthlanpui-ah an ngaihtuahawm khawp ang.
Sorkar hmasa kan hrawn tawhte nena khaikhinin ZPM Sorkar-ah hian Minister leh MLA-te zingah mithiam an thahnem hle a. Minister-te pawh mahni-a Delhi dawr thei deuh vek an ni. CM leh Minster-ho pawh Delhi an zin zing tawh khawp mai. Chutih rualin an sorkar chhung hian Sorkar hmasa leh Central Sorkar hmalakna tih loh, anmahni pual liau liau-a an sual chhuah, Project lian tham sawi tur a la awm lo hle. Mithiam rual awmkhawm, Delhi lama engmah su kaw zo lo hi an ang deuh. Hei hi a chhan ni-a lang chu Central-a sorkar-na chelh mektu BJP Party nen hian an inkarah khi chat lian tak a awm niin a lang a, Central Sorkar hian an dangchat hneh viau ni te pawhin a lang. Chuvangin hmasawnna tak tak thlen tur chuan Politics-a inbeihna leh sakhuana-a inchirhtheh awm tur pawisa lovin BJP leh NDA hi thawhpui mai se, kum thum an la neih chhung hian Development nasa tak kan hmu thei ang. Development ber kan hmuh chuan mipuite hian BJP an thawhpui leh thawhpui loh chungchang chu kan sawi rei peih vakin ka ring lo.