Dampa bial inthlana din tum zingah inhnukdawk awm lo

Dampa bial inthlana din tum
zingah inhnukdawk awm lo
Kumin November 11-a Dampa bial by election neih tura din tum nomination file-tu mi 5 zingah hun hawn a nih chhungin inhnukdawk an awm lo.
Tarlan tawh thin angin, Dampa bial MLA thlan turah hian returning officer Malsawmzuala hnenah John Rotluangliana (Indian National Congress), Lalhmingthanga (Bharatiya Janata Party), Dr R Lalthangliana (Mizo National Front), Vanlalsailova (Zoram People’s Movement) leh K Zahmingthanga (Mizoram People’s Conference) ten nomination paper an thehlut a. Candidate leh political party lam pawhin campaign rusum an thlak ngawrh tawh hle a ni.
Hetihlai hian inthlan buatsaihtu leh a mawhphurtu lam pawh an inbuatsaih chho zel a. Election Commission of India-in expenditure observer atana a ruat Shyam Kumar, IDAS hoin he by election atana sum chingfeltute leh candidate agent-te chu Inrinni khan an thukhawm a. Inthlan felfai leh muanawm kalpui tura account vawn dan dik sawiho a ni.
Assistant expenditure observer Jenny Thanhlupuii’n candidate-te account vawn dan tur, felfai leh dik taka kalpui dan tur a zirtir a. Thutkhawmah hian returning officer, asst. returning officer, asst. expenditure observer, expenditure agents leh candidate agents an tel a ni.
Inrinni vek khan general observer atana ruat MT Reju, IAS hoin polling personnel-te duty dan tur khawl hmanga thliarfel thawhnihna neih a ni a. Polling personnel-te chu khawi hmuna duty tur nge an nih tih khawl hmanga thliar niin, hei hian duty-na hmun emaw duty turah emaw duhsak bik leh tih bik a awm theih loh dan a entir. Polling personnel-te duty na tur khawl hmanga thliarfel thawhthumna hi inthlan hma in neih leh a ni ang.
Thliarfelnaah hian district election officer K Laltlawmlova, returning officer Malsawmzuala bakah election officer Lalnunfela Chawngthu an tel a ni.