Dampa leh central thlunzawm ang – Dr K Beichhua

Dampa leh central thlunzawm ang
– Dr K Beichhua
Dampa bial mipuiin an party candidate an lo thlantlin chuan an bial leh central an thlunzawm thei dawn tih BJP Mizoram hruaitu Dr K Beichhua chuan a sawi.
Thawhtannia an party office-a Dampa bial by election neih tura BJP official candidate atana Lalhmingthanga, West Phaileng puannaah BJP State president Dr K Beichhua, MLA chuan, an candidate chu he bialah tum thum MLA candidate a lo nih tawhna chuan an Dampa bial siamthat a duhna a nei tih a tichianga a hriat thu a sawi a. Bial mipui mamawh leh tlakchham phuhru turin an candidate kaltlangin hma an la anga; health sector zirna, kawng chhia leh mipui mamawh thlensak ngei an tum dawn tih a sawi.
Dampa bial mipuiin thlan tur dik an thlan a, bial hmasawnna atan ngaihtuahna fim seng turin a chah tih a sawi a. Congress party chu central-ah pawh tluchhe mek leh a bul nget mek, MNF lah opposition ni mek, ZPM chu kum 1 leh thla 9 chhung an sawrkarna enin, mipui an lungawi thei loa, MLA an nih mek bial en pawhin hmasawnna thar a thlen hmuh tur a vang hle tih a sawi.
“Keini chuan Dampa bial leh central kan thlunzawm dawn avangin Dampa bial mamawh tak tak chu BJP MLA kan thlantlinin kan nei thei dawn a ni. Tunah hian BJP-in MLA pahnih kan nei a, Delhi leh Siaha district chhung bial pahnih kan thlunzawm mek. Eirawng bawl turin lungthu pathum a ngai angin, Dampa bialah BJP official candidate kan thlantlin chuan, lungthu kimin rawng kan bawl thei anga, hmasawnna kan hmu dawn a ni,” BJP Mizoram president hian a ti.
BJP candidate Lalhmingthanga chuan Dampa bial mipuiin an thlang tling a nih chuan, an bial tana MLA tha ber nih a tum dawn tih a sawi a. Dampa bialah hmasawnna tak tak thlentir chu a tum ber a ni tih a sawi.