Dan anga thil tih loh vangin tawrhna…
Mizorama Kuhva chingtuten Kuhva an hlawkpui ve mek laiin, khawchhak ram atanga dan kalha Kuhva lo lutin harsatna nasa tak a rawn thlen a. Tunah chuan Kuhva chingtute kum khat sum lakluh thin pawh cheng nuai 2000 chuangin a hniam phah dawrh a. Kuhva hlawkpuituten Kuhva vang bawkin an hloh leh ta tihna a ni.
Hachhek Bial Kuhva Chingtu Pawl zirchiannaah kum 2021-ah an kuhva rah hralhna atangin cheng nuai 3,235 chuang an hmu a; kum 2022-ah nuai 5,000 chuang hmuhchhuah an inbeisei laiin, nuai 2,000 chuang an hloh zawk thung a; hei hi thil serious tak a ni.
Mizorama Kuhva tawlhruk buaipui a nih dan leh Kuhvain Mizoram a tihbuai dan chu ni tin chanchin thar atangin mipui pawhin kan hre mawlh mawlh reng a. Kuhva phurtu lirthei a kang hluah hluah reng a, Kuhva escourt-tu lirthei pawhin kut a tuar chho leh tan tawh. Kuhva avanga tawrhna hi a inchherchhuan chho zel a ni ber tawh.
Eng vanga heti tak maia Kuhva hian tun thlenga Mizoram hi a la tihbuai reng mai le? tih hi zawhna tak a ni a. A chhanna atan chuan, ‘dan anga thil tih loh vang’ a tih theih ang.
Pakhatnaah chuan Mizorama Kuhva lo luh dan hi dan anga tih a ni lo phawt a. Mizoram chhunga a kal kual dan zawng zawng pawh hi dan kalh a ni fai ta vek tihna a ni.
Dan kalha thil tih a nih si chuan, engatinge tun thlenga dan kalha Mizoram chhunga Kuhva hi la kal kual reng thei nge a nih? kan tih chuan, ‘thuneitu lamin dan anga thil an tih loh vang’ a tih leh theih awm e. Chumi awmzia chu dan kengkawhtuten dan an kengkawh tha thei lo, tihna a ni.
Ram hmasawn leh changkang kan tihah te hian langsar taka kan hmuh chu, dan kengkawhtuten dan angin hna an thawk a, dan bawhchhetu an awmin dik takin dan angin action an la a, dan bawhchhiatna a tlem.
Mizoramah chuan kuthnathawktute dawmkan ngai tak kan nih lai leh, politician-te pawhin election campaign auhlaa ‘kuthnathawktute dawmkan’ thupuia an neih thin laiin, kuthnathawktute tawrhna lian tak a thleng hlauh thung a. Heng harsatnate hi a tihreh nan sum senso tur ‘estimate’ vak vak a ngai ve hran lo; dan awmsa, a nih dan tur anga kenkawh mai hi a ni.