Sawrkar kum kalta chhunga Transport department hnuaia Aizawl Enforcement staff-ten dan bawhchhia an man lirtheite sum chawi tlingkhawm chu cheng nuai 120 a tling.
DTO Aizawl hotute sawi danin, sumdawn nana hman lirthei hoin dan an zawm tur an zawm loh avangin lirtheite hi manin a hremna atan sumfai an chawitir thin a. Chutihrualin, dan ang diak diaka sum an chawi dawn chuan an chawi tur a san lutuk avangin a na lo thei ang berin an hrem thin tih an sawi a ni.
April 2023 atanga March 2024 chhung khan lirthei 3092 vel dan bawhchhia mante sum an chawi tir a, e-challan a chawi mi 35 an awm. Dan bawhchhia an man, an sum chawi tur ang la chawi lo mi 1000 chuang an la awm a, e-challan a lock an nei nual bawk. e-challan lock tih hi, lirthei dan bawhchhia, enforcement staff hote duty-naa ding duh loa tlantlang emaw, a hmuna chawi nghal tur nei lote emaw an registration tihtawp sak lailawkna a ni.
Hemi hun chhunga dan bawhchhia lirtheite sum chawi tlingkhawm hi Rs. 121,68,500 a ni a. Kumin March thla chhung bik khan sum chawi tlingkhawm hi Rs. 12,02,000 niin, e-challan ah Rs. 2,13,000 nen, a vaia sum an chawitir hi Rs. 14,15,000 a ni.
Dan bawhchhiatna zingah tax chawi hun tura chawi lo leh insurance thi a tam ber tih Transport department hotute hian an sawi a. Lirthei neitu nawlpuiin tax pek an ngaihsak lo thin hle nia an hriat thu sawiin, commercial vehicle ah insurance chawi a san deuh avangin tih loh phah an awm thin nia a lan thu an sawi bawk.
Dan bawhchhia lirthei hremnana sum chawi cheng nuai 120 chuang
Get real time updates directly on you device, subscribe now.
Prev Post