Dan hmanga Industry ram buai chinfel dan tur ngaihtuah tan

Sawrkar dan dinglai anga Industry ram thubuai chinfel dan ngaihtuahin Commerce & Industries minister F Rodingliana hoin Commerce & Industries leh Land Revenue & Settlement department hotute bakah sawrkar ukil-te chu chu Nilaini khan an inrawnkhawm.
Minister chuan industry rambuai chingfel tura hma lak mek chu sawrkar dan dinglai ang thlapa felfai taka hma lak a nih tur thu a sawi a. Sawrkar ukilte chu dan leh hrai chungchangah sawrkar finchhuah zel turin a sawm.
Sawrkar ukil aiawhte chuan department leh sawrkar dan hremite thawhho that a pawimawh zia sawiin, delay awm miah loa he thubuai chinfel a nih theihnan theihtawp an chhuah tur thu an sawi a ni.
Thutkhawmah hian Mizo District Council hunlaia executive order, 1971 December 23 tihchhuahah Luangmual, Tanhril leh Sakawrtuichhun chu ‘protected area’ ah puan a ni a; sawrkar hriatpuina lo chuan pass pekchhuah a khap a ni. 1972 March 18-a executive order dang tihchhuahah Luangmual Village Council huamchhungah sawrkar hriatpuina tel loa pass pekchhuah cancel vek tura tihna order a awm bawk. Hei bakah hian The Mizoram (Land Revenue) Rules 2013 a ziahlan angin, industry ram tana sawrkarin a lo lak tawh chhungah VC pass a awm theih tawh loh thu tarlan a ni.