Dan kenkawh
Chawlhkar kalta chhung khan Aizawl khawpui fai leh thianghlimna tura Municipal Corporation-in dan a neihte bawhchhia mi 42 manchhuah an ni a. Pawisa chawitir an awm a, ti tawh lo tur emaw siam tha tur emawa hriattirna pek an awm bawk.
Dan bawhchhiatte hi, tui luankawra bawlhhlawh paih te, phal lohna hmuna leivung paih te, septic tank enkawl tha lo leh soakpit tel loa septic tank hmang, siam tha tura hriattir (mi 24) te an ni hlawm a. Heng bakah tuichhe luanna fel lo chhungkaw pali pawh an tuichhe luanna siam tha nghal tura hriattir an ni.
Kum nga kalta (Aug, 2019) khan Aizawl khawpui enkawltu AMC chuan plastic ip chi micron 50 aia pan zawrh khapna dan a kalpui tan a, chu chu Plastic Free City-a Aizawl puanna (2nd Oct. 2019) tura inhmakhuana a ni nghal bawk. Ngawrh takin hma an la (dan an kengkawh) a, mahse kan dinhmun chu tun hi a la ni. AMC khan a tirah chuan khauh angreng takin dan an kengkawh a, mahse mar pata dan kenkawh a nih zui rei tak loh avangin ‘plastic free city’-a puan Aizawl chu plastic lamah a la fihlim lo nasa tih chu kan hmu mek a ni.
Tuiluankawr chungchangah pawh, AMC hian a din tirh lam khan hma chu an han la ve phat phat a, mahse tuiluankawr tha tak nei khawpui chu kan la ni pha lo tih chu kan dinhmun hian a lantir mek a nih hi.
Tunah pawh hian khawpui faina leh thianghlimna lam hawiin hma an la thar leh niin a lang a, dan bawhchhiate an han man a, an hrem a, a tha e. AMC hian khawpui enkawlna dan hi khauh takin kengkawh zui zel se, mar pata kum hnih khat vel dan kenkawh a nih chuan, chumi chhung chuan mipui lam pawh kan lo insiamtha (moral reformation) ve hmanin a rinawm.
Ram changkangah mipuiin dan an zah a, an zawm tha kan tih thinna chhan chu eng dang a ni lo a, dan kengkawhtuten a nihna tur angin dan an kengkawh a, mipui tan zawm loh theih a ni lo a, chuta tang chuan mipuiin dan zahna leh dan zawmna an thanhnan ta mai niin a lang.
Hetih rual hian, ram changkangte nena intehkhin diak diak theih kan ni lo tih chu a lang chiang a, law enforcement chungchangah sawrkarin thawktu a nei tam tawk thei lo; chuvangin, khawtlang nena tanhona hi kan hmachhuan thiam a pawimawh dawn hle a ni.