Dan kenkawhnaah mipuiin sawrkar an rin ngam duh

Dan leh hrai kenkawh kawngah mipuiin sawrkar an rin ngam lehzual theih nan thawh a duh a, chutiang tur chuan hmachhawp a nei tih Home minister K Sapdanga chuan a sawi.
Thawhtanni zana Central YMA Central Executive Committee thutkhawm, kumin atana vawikhatna a telpuinaah Home minister chuan, hun kal tawh thlirin, hna khirhkhan zual thawh tak tak chuan sawrkar tuan kan duhkhawp lo fo thin a, sawrkar pawhin YMA hmathehin, engemaw chang phei chuan a papek lutuk lek lek hial thin tih a sawi a. Dan leh hrai kenkawh lamah YMA-in legal sanction a neih bawk si loh avangin, khawtlang tana tlawmngaia thawktute zawk mipui dem hlawh lek lek chang a awm fo tih a sawi.
“Hetiang kawnga tlawmngai pawl leh mipuiin sawrkar a duhkhawp lohna hi YMA ka nihna angte, media mi ka nihna angtein ka lo tawng ve fo tawh a, chuvangin sawrkara he mawhphurhna ka chan chung hian, mipuiin dan leh hrai kenkawh kawnga sawrkar an rin ngam lehzual theihna tura thawh ka duh a, chutiang tur chuan hmachhawp pawh kan nei sa nual a, in mi tawiawm leh finchhuah erawh kan mamawh dawn a ni,” a ti.
Sawrkar tih awm tak leh mawhphurhnaa lak ngeina tur thil tam tak a awm rualin, khawtlang tana thawh ngai tam takah sawrkar tha chakna ngawt chu a tawk lo hle tih hrechiangtu vek kan ni tih K Sapdanga hian sawiin, “NGO ten hmangaihna nen an thawha hlawk zawk thil tam tak a awm a, engemaw chang phei chuan khawi chin nge sawrkar tih atan tha zawk anga, eng chin nge YMA tih tur ramri siam hleihtheih loh a awm thin. Chutiang a nih pawhin, thawhhona tha kan neih theih nan kan inrawn tlang anga, kan relho zel anga, ram leh khawtlang tan tum thuhmun nei kan ni a, chumi tihlawhtling tur chuan lungrual taka thawhhopuiah ka sawm che u a ni,” a ti.