Ram pawna Mizo thalai hna thawk tura thawnchhuaktu, dan zawm kim lo agency-te chunga hremna lekkawh theihna tura sawrkar laipuia an dil chu thla 5 liam hnu ah pawh chhanna an la hmu thei lo tih chief minister Lalduhoma chuan a sawi.
Sawrkar laipui Ministry of External Affairs phalna neia hna thawk tur thawn thei Zofa Agency chu service tan turin Thawhlehni khan Aizawlah chief minister hian a hawng a. Thalai hna zawngte harsatna hria in ram pawnah hna an thawh theih nan Mizoram sawrkar chuan kum 2015 khan Mizoram Private Placement Agencies (Regulation) Act 2015 a siam a. Chu act-ah chuan ‘beyond the boundaries of Mizoram’ tih chu hmun hniha ziah lan niin, chu dan hmang chuan agency 27 hnenah phalna pek a ni a. He danah hian an thuneihna piahlam thil a awm tih hre loin an kalpui ta a, harsatna an tawk ta tih a sawi.
Agency te hian kawng dangin dan an lo bawhchhia a, State Women Commission-in thubuai a thehlut a, nikumah agency 29 man an ni a, an thubuaiah bail theih an nih avangin bail an ni a, investigation tih vek tawh niin, a hremna hi Mizoram sawrkarin prosecution sanction an tithei loa, kumin January khan sawrkar laipuiah an dil a, vawiin thlengin a chhanna an la nghak tih a sawi a ni.
“Kan sawrkar veleh khan heng licence hi kan cancel vek a, tumah licence nei an awm tawh lo. Heng agency thua kan harsatna sutkian theihna awmchhun chu, sawrkar laipui atanga dan ang thlapa licence neih a ni. Ti thei awm se kan duh em em a, vawiinah chutiang ti thei Zofa Agency kan nei hi ka lawm hle,” Lalduhoma hian a ti.
Mizo thalaite ram danga hna sang leh zahawm tak tak thawk theia inbuatsaih tura fuihin, skill development uar turin a chah a. Taiwan, United Kingdom leh South India lama Mizo thalaiten hna an thawh theih dan tur an dap mek tih a sawi a ni.
Dan loa hnathawk thawntute agency-te la hrem thei rih lo
Get real time updates directly on you device, subscribe now.