Dan loa learner leh driving license petute CYMA-in minister an hrilh

Transport department atanga dan dik loa tunhnaia learner leh driving license pekchhuah chungchang an chhuinaah Central YMA chuan a inhnamhnawihte an hrechiang thawkhatah an ngai tih an sawi a. Nilaini khan an chunga hma la turin Transport minister hnenah an document neihte nen ngenna an thehlut.
Central YMA hian hun engemawchen kalta atang khan mi thenkhat leh raltlan zinga thenkhatten driving license awlsam taka an nei mai thei thin chu chhuichiangin, mi engemawzat an kawm a. Heta tanga an thil hmuh chhuah chu, Mizoram mi leh sa dik tak zinga mi thenkhat leh District Transport Officer office (DTO) a thawktute inthurualin, danin a phut anga learner & driving licence nei thei tura lehkha pawimawh (documents) thil tel ngai neilote hnenah learner & driving licence pekchhuah a ni ngei tih an finfiah tih an sawi.
Learner & driving licence siam duh chuan hetiang siam theia insawi, ‘commission’ ho hnenah document engmah pek ngai loin an bituk zat sum tam tham deuh zawk an pe a, an ni hian Aizawl DTO-a thawktute hnenah a pangngaia sum chawi ngai aia tam pe ve lehin, an lo siamsak thin a; hetianga pawnlam mi learners & driving licence siamsak theituten department lama thawktute sum an pekna evidence pawh Central YMA hruaitute hian minister hi an hlan tih an sawi a ni.
Hetianga thil diklo ti thin DTO chhunga thawktute leh pawnlam atanga commission thin, office lam thurualpuitute hi Central YMA chuan an hrechhuak vek tawh tih minister hi an hrilh bawk.
Mizoram khawpui ber, Aizawla DTO-in hetianga an tih theih chuan district dangah pawh hlauhthawn an neih len viau thu Central YMA hruaitute hian an sawi.
Central YMA-in hemi chungchanga hma laksak tura minister an ngenna lehkhaah hian, a enkawl Transport department hnuaia dik lo taka learner & driving licence pekchhuaha inhnam hnawihte chu dan anga na taka hrem tur leh danin a phut documents engmah nei lo leh driving test pawh paltlang loa driving licence pek chhuah mi engemawzat an awm tawh hi a him loh avangin cancel leh tur leh, tunhnua hetiang a thlen tawh loh nan rang taka hma la turin an ngen a ni.
Heng bakah hian ruihhlo phur thin maxi cab leh passenger phur (public carrier) te ruihhlo an phurh nena man chu an public carrier license cancel thin tur leh, hnamdang lirthei, state dang registration nei, passenger phur tur niloin Mizoram hmun hrang hranga passenger phura an tlan thin leh, lirthei neituten garage nei vek tur a nih chungchangah khauh zawka kalpui tura ngenna an thlen tel bawk.