Dan phal loh ramsa hmanga sumdawng mi pahnih man leh

Divisional Forest Office Kolasib thawktuten danin a khap ramsa hmanga sumdawngte an chhuizuinaah state danga hetiang lama inhnamhnawih thurualpui thin hmeichhe pahnih an man belh.
Kumin March 5 zing dar 4.40 vel khan Vairengte Forest Range staff leh Excise & Narcotics tangdun chuan Vairengte ah saphu kawr kg.98 vela rit an man a. Saphu kawr hi maxi cab-a Mizorama rawn phur chhoh niin a, a khalhtu Laldaniela s/o Ranjit, Happy Valley Shillong chauh a chuang a, a hmunah man nghal a ni.
He case hi chhuizui niin, hetianga sumdawnna lama a zawmpuite chhui zui a ni a. He thila inhnamhnawih ngei nia hriat mi pahnih – Lalzuithangi (41) Champhai leh Vanlalzawni (42) Zemabawk Aizawl intite chu man an ni a. Aizawl ami mi pakhat, inhnamhnawih ve nia hriat erawh a fihlim thung.
Kolasib DFO sawi danin, Lalzuithangi hi sawrkar laipuia Wildlife Crime Control Bureau-in hun engemawchen atanga an lo chhui tawh a ni a. A zawmpui sapel mi (poacher) atanga inhnamhnawih ho (middleman) pawh an man kim thawkhat tawh a, Mizoram atanga Burma-a a zawmpui chhuizui niin, amah hi finfiahna tha tawk nena man tuma an veh lai a ni. Guwahati Jail-a tang mek Rindiki Teronpi, Karbi Anglong Assama khawsa nen sakei vun, a ruh leh saphu kawr hmangtea sumdawngin an lo thawk dun tawh thin a ni.
March 14 khan Shillong-ah RO Vairengte, RO Kolasib leh thawktu dangte chuan Meghalaya Forest Department nen tangdunin an thurualpuite hi man an ni a. March 16-ah Kolasib thlenpui in, Aizawla an thurualpui dang pakhat nia hriat pawh hemi zan hian Aizawl Wildlife Division staff-ten manin Kolasib lama lak ve nghal a ni. Heng mi pathum an mante hi Forest department kutah darkar 96 awmin thu zawhfiah an nih hnu ah March 20 zan dar 6.30 vel khan Lalzuithangi leh Vanlalzawni te hi District Jail Kolasib-a dahluh an ni a. Chutih rualin Aizawla mi rinhlelh thilthua man hi he thilah hian a inhnamhnawihna hmuh a nih loh avangin magistrate-in a chhuah a ni.