Dan theih loh Norway leh Haaland

Pathianni zan khan Europe khawmual atanga World Cup 2026 khel tur zawnna neih chhunzawm a ni a, Group I hmahruaitu Norway chuan mikhual an nihna hmunah 4-1 ngawtin Italy an hneh a, World Cup khel turin a tling. An muala tlawm Italy hian play-off an hmachhawn a ngai dawn a, a zawna World Cup vawi thum khel phak lo thei dinhmunah an ding.
Group I ah point thuma hmahruai fal a, goal difference-ah +17 ngawta sang fal bawk Norway hi an mualah 3-0 ngawta an lo hneh tawh Italy hmachhawn turin Milan khawpuia khelmualah hmingthang Stadio Giuseppe Meazza-ah an lenglut. An lenluhna mualah si 17 aia tama an tlawm a nih ngawt loh chuan World Cup khel turin an tling dawn. Dinhmun tha taka ding sa chungin football ram ropui Italy chu an tualzawlah ngei 4-1 ngawtin an sawp zui leh a, dan rual lohin Norway hi World Cup khel turin a tling.
Italy hian an mikhual Norway lakah bul an tan tha viau a, goal an thun hma hle. Inkhel tan atanga minute 11-na lekah Pio Esposito chuan hmahruaina goal a thun nghal. Hma takah goal an thun vangin an phur a, inrintawkna sang zawk nen an inlan zui bawk. Hun rei tak chhung hma hruai bawk mah se chawlhlawk hnu lamah Norway er let an tuar lova, goal li ngawt an chhuah zawn.
Norway tan hian Antonio Nusa chuan minute 63-naah goal thunin an si phurh a sut. An si phurh an sut vangin an phur a, World Cup khel turin an tling ngei dawn tih a chiang tan tawh viau bawk a, Norway hian nuam ti takin Italy an hmachhawn. An si phurh an sut hnu hian Erling Haaland chuan minute 78-naah hma an hruai letna goal a thun. Hma an hruai letna goal lawma mipui au thawm a reh fel hman hmain Haaland bawkin minute 79-naah an goal thumna a thun zui leh zat a, an hmahruaina a tizau.
3-1 a hma an hruai reng hnuin Norway tan hian Jørgen Strand Larsen chuan minute 90’+3-ah an goal lina a thun zui leh cheu a, Italy laka an chakna a nemnghet. Larsen goal thun hnu hian goal dang a luh belh tawh lova, Norway chuan Italy lakah 4-1 in hnehna an chang a, kum 28 hnua a vawi khat nan World Cup khel turin an tling. USA, Mexico leh Canada ten an inthlen tawm tur World Cup 2026 hi Norway in World Cup vawi li an hmachhawnna tur a ni nghal dawn bawk.
World Cup khel tur zawnnaah Norway an khel tha tak zet a, Group I-ah vawi 8 khelin an chak vek a, point hmuh theih zawng zawng an hmu kim vek. Norway hian an khingpuite lakah goal 37 zet an thun a, goal nga chiah an chhuah. Goal 37 an thun zingah goal 16 zet hi Erling Haaland thun a ni. World Cup khel tur zawnna match zawng zawnga goal thun vek Haaland hian assist vawi hnih a nei tel bawk a, a chetha hle. Khawmual hrang hrang atanga World Cup 2026 khel tur zawnnaah Haaland hi goal thun hnem ber a niin topscorer a ni a. Season khatah World Cup khel tur zawnnaa goal thun tam ber rRobert Lewandoski record a nihrual chiah bawk.
Club leh tam tana goal thun reng mai Haaland hi kum 25 chauha upa a ni a, heti chung hian Norway tan goal 55 zet a thun tling der tawh a, ram tan goal 55 thung tling turin khelh 48 chauh a mamawh nghe nghe. Goal thun thulh hlei thei lo Haaland hian season kal meka inelna hrang hrangah vawi 20 chauh khelin goal 32 lai a thun tling der tawh bawk. World Cup-ah goal thun thei bik Haaland inlan tur hian ngaihven a hlawh khawp ang. Season kal meka khel tha tak Haaland hi mimal takin dan theih a ni meuh lova, an ram Norway pawh World Cup khel tur zawnnaah bik phei chuan dang thei an awm lova, an chak vek ringawt mai a ni.
Kum 28 zet hnuah World Cup an khelh dawn vangin Norway in hun hlimawm tak an hman laiin World Cup-a vawi li champion tawh Italy erawh an ngui viau thung. Fotball ram ropui zinga chhiar hmaih theih loh Italy hian vawi hnih ngawt World Cup an khel phak lo zawn tawh. A lungthu kim nan World Cup khel phak lo thut thei an ni leh mek a, an hmabak a hautak dawn hle. Group I-ah Norway laka an tlawm zawn vangin Italy hian play-off an hmachhawn zui a ngai dawn a. Play-off ah an vanduai zui a nih phei chuan an tan mualphona namen lo tak a ni ang a, an tuarah vanpui a chim tak meuh meuh ang.
Group I-ah hian khelh riat atanga point 18 hmuin Italy in pahnihna an luah a. Point 12 hmuin Isarael in pathumna an luah a, Estonia in point li an hmu a, table mawngphaha awm Moldova in chak an nei miah lova, khelh 8 atangin point khat chiah an hmu.